Зимни мулоқоти мақомоти раҳбарии Хадамоти муҳоҷирати назди ҳукумати ҶТ бо роҳбари намояндагии Бонки ҷаҳонӣ дар Душанбе Марша Олив масоили ҳамкорӣ дар соҳаи танзими раванди муҳоҷирати корӣ ва ҳалли масъалаи таъсиси марказҳои омодасозии муҳоҷирон пеш аз сафар мавриди баррасӣ қарор гирифтанд.
Тавре аз маркази матбуоти Хадлдамоти муҳоҷират хабар доданд, М.Олив изҳор кардааст, ки Бонки ҷаҳонӣ ба мусоидат дар ҳалли омодагии пеш аз сафари муҳоҷирони корӣ ва танзими мушкилоти муҳоҷират дар Тоҷикистон омода аст. «Масъалаи таъсиси марказҳои омодагии пеш аз сафари муҳоҷирони корӣ бояд дақиқан ва ҳамаҷониба мавриди омӯзиш қарор гирад», – гуфтааст ӯ.
Мақомоти раҳбарии Хадамоти муҳоҷират ба намояндагии Бонки ҷаҳонӣ дар Тоҷикистон барои мусоидат ба ҳалли мушкилоти муҳоҷирати меҳнатӣ ва кӯмаки ҳамаҷониба дар танзими он изҳори миннатдорӣ намуд.
Дар мулоқот ҷонибҳо ҳамчунин атрофи масъалаи зарурати рушди заминаи илмии муҳоҷират дар Тоҷикистон ва дигар лоиҳаҳои мавриди таваҷҷуҳи тарафайн табодули афкор намуданд.
