Дар минтақаи шарқи ҷумҳурӣ сардори Раёсати Кумитаи давлатии амнияти миллӣ дар Вилояти Мухтори Кӯҳистони Бадахшон генерал-майор Абдулло Назаров кушта шуд. А.Назаров дар канори шаҳри Хоруғ бар асари ҳамлаи шаҳсони номаълум ба қатл расонида шуд.
Тавре ба ОИ «Азия-Плюс» сардори робита бо ҷомеаи КДАМ-и Тоҷикистон Нозирҷон Бӯриев хабар дод, зимни бозгашт аз сафари хидматӣ аз ноҳияи Ишкошим автомашинаи А.Назаровро шахсони номаълум боздошт намуда, ӯро аз мошин берун меоранд ва бо корд якчанд зарбаҳои марговар мезананд.
«Тибқи фарзияи тафтишот, ба қатли генерал-майор А.Назаров ашхоси машғул ба қочоқи маснуоти тамоку даст доранд», – гуфт Бӯриев, аммо аз ифшои дигар ҷузъиёти фарзияи мақомоти тафтишот худдорӣ кард.
Аз рӯйи ин далел парвандаи ҷиноӣ боз шуда, гурӯҳи фаврии тафтишотӣ ташкил шудааст, вале то ҳанӯз касе боздошт нагардидааст.
То соли 2010 Абдулло Назаров ба ҳайси муовини раиси КДАМ фаъолият намуда, қаблан роҳбарии Раёсати КДАМ дар вилояти Суғдро ба уҳда дошт.
Моҳҳои июл ва ноябри соли 2010 матбуоти Қирғизистон генерал-майор А.Назаровро дар паноҳгоҳ додан ба хешовандону наздикони собиқ президенти Қирғизистон Қурмонбек Боқиев муттаҳам карда буданд. Он замон ӯ тамоми иттиҳомотро рад намуда, изҳор дошта буд, ки он ба муташанниҷ сохтани вазъ дар Тоҷикистон равона шудааст.
Акс аз радиои «Озодӣ»
