Раиси шаҳри Душанбе Маҳмадсаид Убайдуллоев сокинони пойтахтро ба суҳбати озоди «Бидуни миёнаравон» даъват мекунад.
«Раиси пойтахт баргузор намудани вохӯрӣ барои табодули афкор ва баррасии масоили муҳими шаҳрдорӣ, мушкилоти мавҷуда ва посух ба суолҳои мавриди таваҷҷуҳи ҷомеаро пешниҳод менамояд», – иттилоъ дод котиби матбуотии раиси пойтахт Шавкат Саидов.
Ба гуфтаи ӯ, доир намудани сӯҳбати озоди «Бидуни миёнарав» рӯзи 23-уми август пешбинӣ шудааст. Дар ҷараёни мулоқот масоили амалисозии Нақшаи генералии шаҳр, бартараф кардани манзилҳои истиқоматии фарсудаву кӯҳна, симои ояндаи пойтахт, вазъи роҳҳои мошингарди шаҳр ва фаъолияти нақлиёти ҷамъиятӣ баррасӣ хоҳанд шуд.
«Ҳамчунин ба мушкилоти мавҷуда дар соҳаи хоҷагии манзилию коммуналӣ, лоиҳаи инноватсионии шаҳрии Mometavonem.tj ва таъмини ғановати бозори истеъмолӣ бо маводи ғизоии мавриди ниёзи аввалияи мардум таваҷҷуҳ зоҳир хоҳад шуд», – иброз дошт Ш.Саидов.
Ҳамчунин зикр гардид, ки аз тамоми хоҳишмандони иштирок дар вохӯрии мазкур дархост карда мешавад, ки ному насаб ва рақами телефони худро дар саҳфаи чорабинии мазкур дар Facebook сабт намоянд, то ки намояндагони кумитаи тадорукотӣ рӯйхати иштирокчиёни имконпазири вохӯриро таҳия созанд.
«Аз Шумо хушнуд хоҳам буд, агар мувофиқи имкон қаблан суолҳои худро ба саҳифаи чорабинӣ ирсол мекардед, то ки мо дар ҳамдастӣ бо роҳбарони сохторҳои салоҳиятнок ба онҳо посухҳои ҳамаҷонибаву қаноатбахш омода мекардем», – гуфта мешавад дар даъвати раиси пойтахт.
Шавкат Саидов ҳамчунин афзуд, айни замон масъалаи имкони пахши вохӯрӣ тариқи он-лайн тавассути шабакаи Интернет мавриди ҳаллу фасл қарор дорад.
