Имрӯз дар Душанбе ҷаласаи 27-уми Шӯрои роҳбарони бонкҳои марказӣ (миллӣ)-и кишварҳои узви Иттиҳоди иқтисодии АвруОсиё ба кор шурӯъ мекунад.
Тавре ба ОИ «Азия-Плюс» котиби матбуотии Бонки миллии Тоҷикистон Абдуғаффор Қурбонов хабар дод, дар кори ҷаласа роҳбарони бонкҳои марказӣ (миллӣ)-и давлатҳои аъзо, аз ҷумла Федератсияи Россия, Белоруссия, Қазоқистон, Қирғизистон, Тоҷикистон, Кумитаи ҳамгироии Иттиҳоди иқтисодии АвруОсиё ва Бонки байнидавлатӣ иштирок хоҳанд кард.
Дар назар аст, ки дар рафти ҷаласа вазъи низоми пардохт ва идораи захираҳои байналмилалии давлатҳои аъзо, қонунгузории давлатҳои Иттиҳоди номбурда дар мавриди масъулияти ташкилотҳои молиявию қарзӣ, таҳлили инкишофи бозорҳои асъори давлатҳои аъзо ва масъалаҳои дигар баррасӣ хоҳанд шуд.
Ғайр аз ин, баррасии Барномаи фаъолияти Шӯрои роҳбарони бонкҳои марказӣ (миллӣ)-и кишварҳои узви Иттиҳоди иқтисодии АвруОсиё барои солҳои 2013-2014 дар назар аст. Аз рӯи ҳар як масъалаи рӯзномаи ҷаласа қарори дахлдор қабул хоҳад шуд.
Шӯрои роҳбарони бонкҳои марказӣ (миллӣ)-и кишварҳои узви Иттиҳоди иқтисодии АвруОсиё 15-уми феврали соли 2001 таъсис дода шуда, ҳамҳангсозии фаъолияти бонкҳои марказии иттиҳод дар масоили сиёсати пуливу қарзӣ, ташаккули қурб ва табдили асъори миллӣ, танзим ва назорати асъорӣ аз ҷумлаи вазифаҳои асосии он маҳсуб меёбанд.
