Дар Маркази исмоилиёни шаҳри Душанбе бахшида ба Рӯзи байнулмилалии духтарон як чорабинӣ доир гардида, иштирокчиёни он ҷой доштани мушкилоти маҳдуд будани ҳуқуқи духтарон дар дастрасӣ ба маълумот, ҳодисаҳои худкушӣ миёни духтарони навҷавон, никоҳҳои барвақтӣ ва зӯроварӣ дар оила нисбати занон дар Тоҷикистонро эътироф намуда, пешниҳод карданд, ки ин мушкилот бояд ба таври комплексӣ ҳал гардад.
Намояндаи Бунёди СММ дар бахши нуфус (UNFPA) дар Тоҷикистон Азиза Ҳамидова мегӯяд, бинобар синнусол мавриди зӯроварӣ қарор гирифтани духтарон, имкони дастрасӣ надоштан ба таҳсил ва барвақт бидуни хоҳиши онҳо ба шавҳар додани духтарон як фоҷеа аст.
Намояндаи Кумитаи умури дини назди ҳукумати ҷумҳурӣ Абдураҳмон Мавлонов бар ин бовар аст, ки дар дини ислом ҳуқуқҳои занону мардон баробар буда, доштани маълумот барои онҳо ҳатмӣ аст. «Мушкилоти худкушӣ миёни духтарон, нофаҳмиҳо дар оила, никоҳи барвақтӣ ва зӯроварӣ нисбати онҳо ҷой доранд ва ин мушкилотро мебояд бо ҷалби рӯҳониёни маъруф ҳал кард, вале тамоми масъулиятро ба дӯши онҳо вогузор кардан ҳам қобили қабул нест», – гуфт номбурда.
Тибқи баъзе маълумот, имрӯз дар кишварҳои дар ҳоли рушд қарордошта беш аз 30%-и духтарон дар синни 18-солагӣ ва то 15% дар синни 15-солагӣ оиладор мешаванд. Ҳамасола ҳудуди 16 млн. нафар духтарони синнусоли аз 15 то 19-сола фарзанд ба дунё меоранд, ки тақрибан 11% таваллуд дар саросари ҷаҳон ба онҳо рост меояд. Дар ҷаҳон беш аз 580 млн. нафар занон бесаводанд, ки ин нишондиҳанда нисбат ба мардон беш аз ду баробар бештар аст.
