Тӯли се соли минбаъда ҳукумати Тоҷикистон ният дорад, ки барои рушди иқтисоди миллӣ дар шакли қарзу сармоягузорӣ ва бурсҳо 1 млрд. 576 млн. доллари ИМА маблағ ҷалб намояд.
Муовини вазири молияи ҷумҳурӣ Ҷамолиддин Нуралиев зимни шарҳи лоиҳаи Барномаи қарзҳои давлатии хориҷӣ барои солҳои 2013-2015 дар парлумон изҳор кард, ки
барои таъмини рушди иқтисоди миллӣ ҳукумат то ахири соли равон 95,8 млн., соли оянда – 187 млн., соли 2014 – 145 млн. ва соли 2015 – 127,7 млн. доллари ИМА маблағ ҷалб хоҳад намуд.
«Қарздиҳандагони асосӣ Бонки осиёгии рушд, Бонки ҷаҳонӣ, Хазинаи байнулмилалии асъор, Бонки исломии рушд ва Бонки аврупоии таҷдиду рушд мебошанд», – гуфт вай.
Ба гуфтаи Нуралиев, қарзҳо асосан ба рушди бахши кишоварзӣ, тандурустӣ, маориф ва энергетика равона хоҳанд шуд. «Тӯли се соли оянда ба Тоҷикистон дар шакли бурс 624,8 млн. доллари ИМА маблағ дастрас хоҳад шуд», – иброз дошт ӯ.
Зимни ибрози андеша оид ба ин масъала вакили парлумон Исмоил Талбаков изҳор кард, ки нисбат ба ахири солҳои 90-ум қарзҳои се соли минбаъда 4 маротиба камтар буда, қобилиятнокии пардохтпазирии қарзии Тоҷикистон ба эътимоди ниҳодҳои молии байнулмилалӣ меафзояд.
«Ин қарзҳо хусусияти истеҳсолӣ дошта, бевосита ба рушди иқтисодӣ миллӣ нигаронида шудаанд ва чун қарзҳои пешина хусусияти истеъмолӣ надоранд», – қайд кард Талбаков.
Ба андешаи вакили парлумон Суҳроб Шарифов, чанде аз ВАО масоили қарзи хориҷии Тоҷикистонро нодуруст ва пурғараз инъикос намуда, баъзе рӯзноманигорон пешгӯи мекунанд, ки солҳои наздик Тоҷикистон аз фишори қарз ба нокомӣ дучор мегардад ва ин андешаи беасос дар ҷомеа низ роҳандозӣ мешавад.
Ӯ таъкид дошт, ки тамоми ҳаҷми қарзи хориҷии Тоҷикистон ҳатто 30%-и Маҷмӯи маҳсулоти дохилии кишварро ташкил намедиҳад. Ӯ аз муовини вазири молия дархост намуд, ки пешгӯии Хазинаи байнулмилалии асъор (ХБА) оид ба таъсири манфии қарзи давлатӣ ба рушди иқтисоди ҷумҳуриро шарҳ диҳад.
Дар посух Ҷамолиддин Нуралиев зикр кард, ки ӯ худ муддати 7 сол дар сохторҳои ХБА ва Бонки ҷаҳонӣ фаъолият намуда, аз таҳияи чунин пешгӯиҳо огоҳ аст.
«Зимни таҳияи чунин пешгӯиҳо ХБА ва Бонки ҷаҳонӣ аз нишондиҳандаҳое истифода мекунанд, ки онҳоро метавон ба иқтисоди кишварҳои рушдёфта ё дар ҳоли рушд қарордошта нисбат дод ва таври маъмул, дар онҳо ҳаҷми интиқоли маблағҳои пулии муҳоҷирони кории тоҷик ба инобат гирифта намешаванд», – гуфт муовини аввали вазири молия.
Ӯ ба вакилони парлумон итминон дод, ки ба Тоҷикистон ҳеҷ гуна буҳронҳои қарзӣ таҳдид нахоҳанд кард.
Вакилон бо аксари овоз Барномаи қарзи давлатии хориҷии Тоҷикистон барои солҳои 2013-2015-ро маъқул шумориданд.
