Сӯхтори нимаи дуюми дирӯз дар тарабхонаи «Шаббода»-и пойтахт сарзада масоҳати 390 метри мураббаъи як қисми биноро фаро гирифта, сабаб ва ҳаҷми хисороти расида аз он мавриди таҳқиқ қарор доранд.
Бино ба маълумоти Вазорати корҳои дохилии ҷумҳурӣ, нимаи дуввуми дирӯз соати 15:15 дақиқа ба Маркази алоқаи Сарраёсати хадамоти давлатии оташнишонии ВКД хабар расидааст, ки дар тарабхонаи «Шаббода» воқеъ дар кӯчаи «Ҳаёти Нав»-150 шаҳри Душанбе, сӯхтор ба амал омадааст. «Баъд аз панҷ дақиқаи расидани хабар ду адад нақлиёти сӯхторнишонӣ ба ҷойи ҳодиса ҳозир шуданд», – зикр мегардад дар хабар.
Ба иттилои манбаъ, ба хомӯш кардани сӯхтор 7 адад нақлиёти сӯхторнишонӣ, се адад нақлиёти обкашонӣ ва 80 нафар кормандони сӯхторнишонӣ сафарбар карда шуда, соати 16: 30 дақиқа он ба пуррагӣ хомӯш карда шудаст.
