Дар гузориши дуюм оид ба фаъолияти экологии коршиносони Комиссияи иқтисодии аврупоии СММ чунин хулоса мешавад, ки дастрасӣ ба оби тозаи ошомиданӣ ва ҳамчунин мушкилоти истифодаву безараргардонии партовҳо аз ҷумлаи мушкилоти умдаи Тоҷикистон ба шумор мераванд.
Дар гузориш зикр мегардад, ки сарфи назар аз захоири фаровони обӣ, танҳо сеяки аҳолии Тоҷикистон ба истифодаи оби хлоршуда тавассути қубурҳо (водопровод) имкон доранд ва ҳамагӣ 5%-и шаҳрвандони ҷумҳурӣ дар манзилҳои дорои низоми обу корез зиндагӣ мекунанд.
Ҳамчунин гуфта мешавад, мушкилоти таъминоти об тавъам бо таъмини номунтазами барқ бештар душвортар мегардад. Дар робита ба партовҳо зикр мегардад, ки ҷамъоварии партовҳои дурушт танҳо дар шаҳрҳо анҷом дода мешавад, ки дар онҳо 26%-и аҳолии кишвар иқомат дорад, аммо ҳатто ягона партовгоҳи шаҳри Душанбе ба меъёру талаботи санитарӣ ҷавобгӯ нест.
Дар идома баён мегардад, ки партовгоҳҳои маҳсулоти саноати истихроҷи кӯҳӣ ба солимии аҳолӣ таҳдид эҷод месозанд. Дар минтақаи шимоли Тоҷикистон 54,8 млн. тонна партовҳои истихроҷи уран то ҳанӯз дар анборҳо ва партовгоҳҳои номусоид ва хатарнок нигоҳдорӣ мешаванд.
Муаллифони гузориш як қатор иқдомоти мусбат дар бахши қонунгузориро зикр намуда, дар соҳаҳои ҳифзи табиат, идоракунии захоири обӣ ва партовҳо, ҳифзи гуногунии биологӣ ва ҳифзи тандурустии аҳолӣ 47 тавсия пешниҳод кардаанд.
