Имрӯз дар Пажуҳишгоҳи акушерӣ, гинекологӣ ва перинатологияи Тоҷикистон аз ҷониби нахустин зани бо роҳи сунъӣ ҳомиладоршуда дугоникҳо ба дунё оварда мешаванд.
Тавре ба ОИ «Азия-Плюс» сухангӯи Вазорати тандурустии ҷумҳурӣ Фотима Ғоибова хабар дод, айни замон омодагӣ ба ҷарроҳии берун овардани тифлакон (кесарево сечение) ҷараён дошта, ҷарроҳӣ аз ҷониби директори Пажуҳишгоҳ Шамсиддин Қурбонов ва мутаххасисони варзидаи ин муассисаи тиббӣ анҷом дода мешавад.
Ба гуфтаи вай, бо роҳи сунъӣ бордор кардани ин зан дар маркази тиббии «Насл» сурат гирифтаааст. «Маркази мазкур соли сипаришуда дар Душанбе ба фаъолият шурӯъ намуд», – гуфт ӯ.
Номбурда ҳамчунин изҳор кард, ки дар Тоҷикистон танҳо бо иштирок ва розигии ҳамсарон амали бордоркунии сунъӣ анҷом дода мешавад. «Ғайр аз зани зикршуда, боз як зани дигар низ бо роҳи бордоркунии сунъӣ дугоник таваллуд хоҳад кард», – афзуд Ф.Ғоибова.
