Прокуратураи нақлиёти Тоҷикистон пас аз баррасии далели қонуншиканиҳо нисбати мусофирон дар Фурудгоҳи байнулмилалии Душанбе, ки дар мавриди он дар ҳафтаномаи «Азия-Плюс» таҳти унвони «Соҳибкорон дар фурудгоҳи Душанбе» мавод ба табъ расид, парвандаи ҷиноӣ боз намуд.
Тавре ба ОИ «Азия-Плюс» аз прокуратураи нақлиёт дар ин робита хабар доданд, парвандаи ҷиноятӣ аз рӯи далели фиреб ҳангоми рӯйпеч намудани бағочи мусофирон боз шудааст.
Ҳамчунин раҳбарияти Фурудгоҳи байнулмилалии Душанбе ба идораи ОИ «Азия-Плюс» иттилоъ дод, ки шартномааш бо ширкати «Сорбони умед»-ро, ки шурӯъ аз соли гузашта ин ҷониб ба рӯйпеч намудани бағочи мусофирон машғул буд, бекор кардааст.
Дар номаи расмӣ таҳти имзои раҳбари фурудгоҳ Рустам Холиқов зикр мегардад, ки аз оғози фаъолияти ширкати «Сорбони умед» дар толори бақайдгирии фурудгоҳ, борҳо даъвоҳои шифоҳии мусофирон оид ба қонуншикании кормандони марбут ба рӯйпеч кардани бағочи мусофирон ҷой доштаанд, аммо сарфи назар аз огаҳии чандинкаратаи раҳбарияти фурудгоҳ, кормандони ширкат амалашонро идома додаанд. Зимнан зикр мегардад, ки аз натоиҷи тафтишот иловатан хабар дода мешавад.
