Дар толори бузурги Консерваторияи миллии Тоҷикистон аз ҷашнвораи мусиқӣ бахшида ба 20-умин солгарди таъсиси Қувваҳои Мусаллаҳи ҶТ таҳти унвони «Васфи Ватан» натиҷагирӣ шуд. Чорабинӣ аз ҷониби ташкилоти ҷамъиятии ҷавонони «Созандагони Ватан»-и Ҳизби халқии демократии Тоҷикистон созмон дода шуд.
Тавре ба ОИ «Азия-Плюс» роҳбари Маркази таблиғот ва таҳлили КИМ ҲХДТ Адҳам Мирсаидов хабар дод, ҷашнвора аввали моҳи феврал оғоз гардида, дар он донишҷӯёни Консерваторияи миллӣ, Донишкадаи ҳунар, коллеҷи мусиқии ба номи Аҳмад Бобоқулов ва сарбозони гарнизони ҳарбии дДшанбе ширкат варзиданд.
«Муовини аввали раиси ҲХДТ Сафар Сафаров ба иштирокчиёни фаъоли ин чорабинӣ диплом ва туҳфаҳои хотиравии ҳизбро тақдим намуд», – зикр кард Мирсаидов.
Ба қавли ӯ, рӯзҳои истироҳати ҳафтаи гузашта беш аз 3 ҳазор нафар фаъолони ҷавони ҲХДТ дар шанбегиҳои доиргардида дар боғҳои истироҳату фароғати пойтахт ва ҳамчунин Боғи Ғалабаи шахри Хуҷанд иштирок карданд.
