Ахири ҳафтаи сипаришуда вазири молияи Тоҷикистон Сафаралӣ Наҷмиддинов бо гурӯҳи Бонки ҷаҳонӣ таҳти сарварии роҳбари баронмаи рушди энергетика дар Осиёи Марказӣ Сунил Хусла мулоқот орост.
Бино ба иттилои котиботи Вазорати молияи ҷумҳурӣ, дар ҷараёни мулоқот атрофи масоили муҳим ва дурнамои ҳамкориҳои дуҷониба дар бахши молия ва дигар бахшҳо табодули назар сурат гирифт.
Ҷонибҳо ба масоили рушди бахши энергетика дар Тоҷикистон, аз ҷумла таҳияи тарҳи фанниву иқтисодии сохтмони хатти баландшиддати барқи CASA-1000 ва ҳамчунин дигар масоили рӯзмарра таваҷҷуҳи хосса зоҳир намуданд.
Дар мулоқот ҳамчунин масъалаҳои ҷараёни амалисозии барномаҳои пешбинишуда, расонидани кӯмаки техникиву молиявӣ ба Тоҷикистон ва ҳамчунин нақши созмонҳои байнулмилалии молиявӣ дар ин самт низ баррасӣ шуданд.
С.Наҷмиддинов зикр кард, ки дар давоми ҳамкорӣ бо Бонки ҷаҳонӣ дар қисмати роҳандозии ислоҳот дар бахши молиявии Тоҷикистон, пешравиҳои зиёд ба даст оварда шуданд. Ӯ изҳори боварӣ намуд, ки минбаъд низ ҳамкориҳо бо Бонки ҷаҳонӣ дар асоси созандагӣ густариш меёбанд.
