Чанде қабл дар Душанбе мулоқоти вазири корҳои хориҷии Тоҷикистон Ҳамрохон Зарифӣ ва ноиби президенти Ҳиндустон Шри Моҳаммад Ҳамид Ансорӣ бо иштироки ҳайатҳои ду кишвар баргузор шуд.
Бино ба иттилои департаменти иттилооти Вазорати корҳои хориҷии ҶТ, дар оғози вохӯрӣ масоили татбиқи санадҳое, ки дар рафти сафари давлатии президенти Тоҷикистон ба Ҳиндустон моҳи сентябри соли гузашта ба имзо расида буданд, баррасӣ гардиданд.
Зимни сӯҳбат маҷмӯи васеи масоили робитаҳои дуҷониба, аз ҷумла дар соҳаҳои иқтисодӣ, сармоягузорӣ, тиҷорат, энергетика, сайёҳӣ, маориф, фарҳанг ва технологияҳои муосир мавриди муҳокима қарор гирифтанд.
Ҷонибҳо аз ҳамкорӣ дар бахши энергетика изҳорӣ қаноатмандӣ намуда, таҷдиди нерӯгоҳи барқи обии Варзоб-1-ро аз намунаҳои назарраси ин ҳамкорӣ номиданд. Инчунин ҷалби сармояи ҳиндустонӣ ҷиҳати сохтмони нерӯгоҳҳои барқӣ-обӣ дар Тоҷикистон муҳим арзёбӣ гашт.
Дар рафти мулоқот Вазири корҳои хориҷии Тоҷикистон татбиқи лоиҳаҳои хурди Ҳиндустонро дар Тоҷикистон иқдоми саривақтӣ дар самти густариши муносибатҳои иқтисодии дуҷониба номид.
Тарафҳо оид ба вазъи кунунӣ ва ояндаи Афғонистон табодули назар намуда, татбиқи мувофиқатҳои конфронси RECCA V барои таъмини амнияту суботи минтақа зарур шумориданд.
Дар ҷараёни мулоқот инчунин таъкид гардид, ки барқарор намудани алоқаи ҳавоӣ байни Тоҷикистон ва Ҳиндустон барои тавсеи ҳамкориҳои дуҷонибаи минбаъда ниҳоят муҳим мебошад.
Вазири корҳои хориҷии Тоҷикистон роҷеъ ба рушди ҳамкориҳои дуҷониба дар соҳаи сайёҳӣ ибрози назар намуда, хотиррасон кард, ки соли 2014 дар Тоҷикистон 700 солагии мутафаккири бузурги шарқ Мир Саид Алии Ҳамадонӣ таҷлил мегардад. Дар ин ҷода, ташкил кардани сафари пайравони зиёди ин мутафаккири бузург аз Ҳиндустон ҷиҳати зиёрати оромгоҳи Мир Саид Алии Ҳамадонӣ дар ш. Кӯлоб яке аз самтҳои ояндадори рушди ҳамкориҳои дуҷониба дар соҳаи сайёҳӣ арзёбӣ шуд.
Ҳамчунин гуфтугӯи судманд роҷеъ ба ҳамкориҳо дар доираи созмонҳои минтақавию байналмилалӣ, аз ҷумла СММ сурат гирифт.
