Субҳи имрӯз дар литсей-интернати президентӣ воқеъ дар кӯчаи Шерализода 17-и ноҳияи Синои шаҳри Душанбе сӯхтор сар зад.
Бино ба иттилои ВАзорати корҳои дохилии ҷумҳурӣ, фавран ба ҷойи ҳодиса 3 адад автомашинаҳои сӯхторхомӯшкунӣ ва ду нақлиёти махсуси оташнишонӣ сафарбар карда шуда, роҳбарияти Сарраёсат низ ба ҷойи ҳодиса ҳозир шуданд.
Ҳангоми ба ҷойи ҳодиса расидани оташнишонон дар дохили посбонхона ва ошхона, ки дар шафати якдигар ҷойгиранд, дар масоҳати умумии 8 метри мураббаъ молу ашёҳо месӯхтанд.
Дар натиҷаи гузаронидани амалиёти фаврӣ сӯхтор базудӣ иҳота ва дар соати 08:44-дақиқа ба пуррагӣ хомӯш карда шуд. Дар рафти сӯхтор ҳеҷ кас зарари ҷисмонӣ набардоштааст. Аз рӯи мушоҳидаҳои мутахассисони соҳа бар меояд, ки эҳтимол сабаби сӯхтор расиши кӯтоҳи ноқилҳои барқӣ дар барқтақсимкунак бошад.
Омилҳои сар задани сӯхтор ва миқдори зарар аз тарафи коршиносони Сарраёсати Хадамоти давлатии оташнишонии ВКД Ҷумҳурии Тоҷикистон муайян карда мешавад.
