Дар гузориши «Мониторинг ва огоҳии барвақтӣ дар Тоҷикистон» бо истинод ба ШСХК «Барқи тоҷик» зикр мегардад, ки моҳи апрели соли равон дар Тоҷикистон беш аз 1,3 млрд. кВт/соат нерӯи барқ истеҳсол шудааст, ки дар муқоиса бо нишондиҳандаи моҳи марти ҳамин сол ба миқдори 8,2% ё худ 47,5 млн. кВт/соат камтар аст.
Дар гузориш гуфта мешавад, моҳи гузашта ба ҳисоби миёна шабонарӯзӣ дар ҷумҳурӣ 43 млн. кВт/соат нерӯи барқ истеҳсол гардида, моҳи апрели соли гузашта ин нишондиҳанда ба миқдори 29 млн. кВт/соат зиёдтар буд.
Моҳи апрели соли ҷорӣ ҳаҷми истифодаи умумии нерӯи барқ дар кишвар 1 млрд. 274 млн. кВт/соатро ташкил дод, ки нисбат ба моҳи марти соли ҷорӣ 10,7% камтар аст, вале дар муқоиса бо моҳи апрели соли гузашта 38 млн. кВт/соат бештар мебошад.
Дар гузориш таъкид мегардад, ки моҳи апрели соли равон ба Афғонистон дар ҳаҷми 31,6 млн. кВт/соат (ҳудуди 3% аз ҳаҷми умумии истифода дар Тоҷикистон) нерӯи барқ интиқол дода шуд, ки тақрибан 29% камтар аз ҳаҷми содиршуда дар моҳи март аст. Моҳи марти соли равон аз Тоҷикистон ба Афғонистон ҳудуди 41 млн. кВт/соат нерӯи барқ интиқол гардида буд.
Гуфта мешавад, тайи 4 моҳи соли ҷорӣ дар Тоҷикистон дар маҷмӯъ беш аз 5,6 млрд. кВт/соат нерӯи барқ истеҳсол карда шудааст.
