Филиали ширкати байнулмилалии Innovative Road Solutions (IRS) дар Тоҷикистон низоми толлингии идоракунии зерсохтори роҳи моишнгарди Душанбе-Чанакро иваз карданист.
Бино ба иттилои хадамоти матбуоти ширкати IRS, барои иваз кардани низоми толлингии мавҷуда ширкат тендери байнулмилалӣ эълон карда, ширкати русиягии «Техно-Траффик» аллакай ба он таваҷҷуҳ зоҳир сохтааст.
Гуфта мешавад, ҳафтаи гузашта мутахассисони ширкати «Техно-Траффик» ҷиҳати шиносоӣ бо лоиҳаи роҳи мошингарди Душанбе-Чанак ва ҳамчунин омӯзиши низоми толлингии мавҷуда дар он аз Тоҷикистон боздид кардаанд.
Зимнан зикр мегардад, ки мутахассисони ширкати «Техно-Траффик» бо фаъолияти филиал дар самти нигоҳдорӣ ва идоракунии инфрасохтори роҳи автомобилгард дар заминаи толлинг ошноӣ пайдо карданд. Мутахассисони бахши технологияи иттилоотии филиал дар навбати худ доир ба системаи ҷории толлингӣ, механизми муайянсозии изофабор, системаи мониторинги он-лайн, нақшаи пайванди оптикӣ ва ҷанбаҳои дигар маълумоти муфассалро мавриди таваҷҷуҳи меҳмонон қарор доданд.
Дафтари асосии ширкати «Техно-Траффик» дар шаҳри Маскав қарор дошта, шурӯъ аз соли 2002 он ба ташкили низомҳои нақлиётии интеллектуалӣ машғул аст.
Дар филиали IRS аз иштироки дигар ширкатҳои гуногуни дорои таҷрибаи таҳия ва татбиқи раҳёфтҳои муосир бо ҷалби технологияи пешрафта дар бахши идоракунии толлингӣ дар тендер интизорӣ доранд.
Ёдрас мекунем, ки механизми толлингии идораи зербинои роҳи мошингарди Душанбе-Чанак 31-уми марти соли 2010 расман ҷорӣ шуд. Механизми мазкур таҳти идораи филиали ширкати бритониёии Innovative Road Solutions (IRS) дар Тоҷикистон қарор дорад. Айни замон дар роҳи мошингарди Душанбе-Чанак 7 плазаи толлингӣ – «Варзоб», «Ҳушёрӣ», «Майхӯра», «Шаҳристон», «Истаравшан», «Деҳмой» ва «Чорух» фаъолият доранд.
