Аксияи Вазорати тандурустии Тоҷикистон таҳти унвони «Корвони солимӣ» дар вилояти Суғд дар арафаи анҷомёбӣ қарор дошта, дар ҷараёни он беш аз 100 нафар табибон ройгон ба сокинони вилоят хизматгузории тиббӣ пешниҳод намуданд.
Тавре ба ОИ «Азия-Плюс» аз Вазорати тандурустии ҶТ иттилоъ доданд, шурӯъ аз 2-юми июл то имрӯз дар доираи аксия беш аз 20 нафар аз ҷониби профессорони пойтахт ройгон ҷарроҳӣ шуданд, ки дар ин кор мутахассисони маҳаллӣ ба онҳо кӯмак расониданд.
«Дар шаҳри Хуҷанд, ноҳияҳои Ашт, Истаравшан, Панҷакент, Айнӣ, Кӯҳистони Мастчоҳ ва Зафаробод машваратҳои тиббӣ ва ҷарроҳиҳо гузаронида шуда, чорабинӣ фардо, 3-юми июл дар Исфара ба итмом мерасад», – гуфтанд дар Вазорати тандурустӣ.
Дар Вазорати тандурустӣ зикр карданд, ки ба ҳайати «Корвони солимӣ» мутаххассисони соҳибкасб аз ҳисоби табибони варзида, кормандони ғайриштатии вазорат, омӯзгорони Донишгоҳи давлатии тиббии Тоҷикистон ва Донишкадаи омодагии баъдидипломии кадрҳои тиббии ҶТ шомиланд.
Зимнан зикр гардид, ки аксияи «Корвони солимӣ» нимаи моҳи апрели соли ҷорӣ оғоз гардида, қаблан дар шаҳри Душанбеву вилоятҳои Хатлону ВМКБ ва навоҳии тобеи марказ низ баргузор шуд.
