Комиссияи марказии интихобот ва раъйдиҳии Тоҷикистон барои ташкили овоздиҳии муҳоҷирони кории тоҷик дар интихоботи президентӣ дар 22 шаҳри бузурги Русия қитъаҳои овоздиҳӣ боз карданист.
Тавре ба ОИ «Азия-Плюс» роҳбари маъмурияти КМИР Тоҷикистон Абдуманнон Додоев хабар дод, дар интихоботи парлумони соли 2010 ҳамагӣ дар 8 шаҳри Русия қитъаҳои овоздиҳӣ боз шуда буданд.
«Дар ҳамдастӣ бо Вазорати корҳои хориҷӣ ва Хадамоти муҳоҷирати ҷумҳурӣ КМИР аз тамоми имконоти мавҷуда истифода хоҳад кард, то ки ҳарчи бештар муҳоҷирони корӣ дар интихобот ширкат варзанд», – зикр кард Додоев.
Ӯ ҳамчунин ба ақидаи бархе аз роҳбарони аҳзоби сиёсӣ перомуни дар Русия кору иқомат доштани аз 1,5 то 2 млн. нафар муҳоҷирони тоҷик қотеъона изҳори норозигӣ кард ва таъкид дошт, ки тибқи маълумоти расмии ҳукумат, айни замон дар Русия аз 800 то 900 ҳазор шаҳрвандони Тоҷикистон кору зиндагӣ мекунанд.
«Тибқи омори расмӣ ва ҳисобҳои мо, аксари муҳоҷирони корӣ тирамоҳ ба ватан бармегарданд ва онҳо дар маҳалли зисти худ дар интихобот иштирок хоҳанд кард», – афзуд номбурда.
