Сиёсатшинос ва журналисти тоҷик Нуралӣ Давлатов дар робита ба масъалаи пешбарии номзадҳо ба мансаби президентӣ изҳор намуд, ки пешгӯии се моҳ пеши ӯ дар мусоҳиба ба хабарнигори ОИ «Азия-Плюс» оид ба эътилоф таъсис дода натавонистани мухолифини тоҷик дуруст баромад.
Ба андешаи ӯ, Ойниҳол Бобоназарова, ки аз ҷониби Иттиҳоди нерӯҳои ислоҳотхоҳи Тоҷикистон пешбарӣ шуд, ба гуфтаи худи ӯ, номазади миёни ҷонибҳо мувофиқашуда аст.
«Аксаран боварӣ доштанд, ки аз ҳама мухолифи шадид Раҳматилло Зойиров номзад мешавад ва ӯ воқеан ҳам барои ҳукумат мухолифи шоиста мебошад. Ба ҳар ҳол, бояд қайд кунам, ки ҲСДТ-и таҳти сарварии Зойиров қарордошта дар ҷомеа нуфузи зиёде надорад», – зикр кард Давлатов.
Дар идома ӯ иброз дошт, ки 8-9 сол қабл, дар интихоботи парлумонии солҳои 2005-2006, дар остонаи интихоботи президентии соли 1999 низ аҳзоби сиёсӣ ба таъсиси эътилоф кӯшиш ба харҷ дода буданд ва дар маъракаи интихоботии соли 1991 бошад, ҲНИТ ҳарчанд расман изҳор дошта буд, ки номзад аз нерӯҳои демократиро дастгирӣ мекунад, вале дар амал ҷонибдории зиёде зоҳир накард.
«Бобоназарова дар таъсиси Ҳизби демократии тоҷикистон саҳм дорад. Бобоназарова ҳангоми ба қудрат расидани ҳукуматдорони кунунӣ, ки ӯро ба ҳабс гирифтанду сипас зери фишори шадиди ҷомеаи байнулмилалӣ маҷбур шуданд озодаш кунанд, аз саҳнаи сиёсӣ дур шуд. Ӯ номзади арзанда ба мансаби президентӣ буда, солҳои тӯлонӣ дар САҲА ва Бунёди Сорос фаъолият дошт. Шахси ҷасури қавиирода ва бисёр зинаҳои мушкили ҳаётро паси сар намуд. Аз ин рӯ, ба гумон аст, ки нисбати ӯ ҳукуматдорон бо истифода аз фишангҳои фишор кор гиранд, зеро кӯшишҳои фишор ба корманди (бигзор собиқ) ду созмони бонуфузи байнулмилалӣ ба ҷанҷоли пурсарусадои байнулмилалӣ боис шуда метавонад», – чунин мешуморад коршинос.
Ба қавли ӯ, айни замон масъалаи муҳимтарин барои О.Бобоназарова ба созиш овардани ҲНИТ ва ҲСДТ аст, зеро дар акси ҳол роҳандозии фаъолияти ҳатто ситоди пешазинтихоботӣ низ мушкил хоҳад шуд.
