Чанде қабл вазири корҳои хориҷии Тоҷикистон Ҳамрохон Зарифӣ дар маросими ифтитоҳи консулгарии фахрии Тоҷикистон дар шаҳри Гамбурги Олмон ширкат варзид.
Бино ба иттилои Вазорати корҳои хориҷии ҶТ, дар ин маросим роҳбарони заминҳои федералии Гамбург ва Шлезвиг-Голштейн, корпуси консулгариҳо, намояндагони бахшҳои тиҷорату иқтисод, доираҳои кориву илмӣ, рӯзноманигорон ва шаҳрвандони тоҷики муқими шаҳри Гамбург ҳузур доштанд.
Зимни суханронӣ назди ҳозирин Ҳ.Зарифӣ таъкид намуд, ки ифтитоҳи консулгарӣ яке аз натиҷаҳои амалисозии тавофуқҳои ҳосилшуда зимни сафари расмии президенти Тоҷикистон ба Олмон дар соли 2011 ва ҳамчунин натиҷаҳои гуфтушуниди ҷонибҳо оид ба рушду таҳкими ҳамкориҳо дар самтҳои гуногуни мутақобилан судманд бо шумули густариши ҳамкориҳо байни манотиқи кишварҳо мебошад.
Вазири корҳои хориҷии Тоҷикистон ҳамчунин зикр кард, ки ниҳоди консулгариҳои фахрӣ воситаи пурсамари рушди ҳамкориҳои дуҷониба аст. «Ифтитоҳи ин консулгарӣ ба болоравии сатҳи ҳамкориҳои дуҷонибаи иқтисодиву тиҷоратӣ, илмиву фарҳангӣ ва робитаҳои гуманитарӣ саҳми назаррас хоҳад гузошт», – изҳори итминон кард Ҳ.Зарифӣ.
Ба иттилои манбаъ, аз Гамбург вазири корҳои хориҷии Тоҷикистон ҷиҳати иштирок дар ҷаласаи Шӯрои ҳамкорӣ миёни Иттиҳоди Аврупо ва Тоҷикистон бо сафари корӣ ба Шоҳигарии Белгия раҳсипор гардид. Дар рафти Шӯрои ҳамкорӣ, ки дар шаҳри Брюссел барпо мегардад, ҷонибҳо масъалаҳои муҳими ҳамкориҳоро байни Тоҷикистон ва Иттиҳоди Аврупо, инчунин масоили байналмилалиро муҳокима хоҳанд кард.
