Роҳбари намояндагии Gazprom International дар Тоҷикистон Игор Шаталов маълумот дар бораи зиёд шудани саҳми Тоҷикистон дар чоҳи пармашудаи «Шаҳринав-1п» дар кони Сариқамишро рад кард.
Қобили зикр аст, ки бино ба маълумоти чанде аз ВАО, зимни сафари раиси Раёсати ҶСК «Газпром» Алексей Миллер ва роҳбари Gazprom International Валерий Гуляев ба Душанбе, гӯё ҷонибҳо ба мувофиқа расидаанд, ки ҳиссаи Тоҷикистон дар захираҳои гази кони Сариқамиш аз 25 то 30% афзуда шавад.
«Дар бораи ягон қарордоде оид ба тақсими маҳсулот ман огаҳие надорам ва ин ҷои шарҳ ҳам надорад», – иброз дошт ба хабарнигори ОИ «Азия-Плюс» Шаталов.
Аз Саридораи геологияи назди ҳукумати Тоҷикистон дар ин робита хабар доданд, ки дар ин самт миёни Тоҷикистону ширкати «Газпром» алҳол танҳо як шартнома – Созишнома дар бораи усулҳои умумии баргузории омӯзиши геологии захираҳо дар майдонҳои нафтугаздори Тоҷикистон амал мекунад.
«Агар қарордод дар бораи тақсими маҳсулот ба имзо мерасид ҳам, мутобиқи он бояд ҳатман тамоми расмиёти зарурӣ, аз ҷумла тартиби мувофиқасозӣ бо идораи мо доир гардида, пешниҳодҳои моро низ бояд ба инобат мегирифтанд, вале ҷиҳати баррасӣ ба мо чунин созишнома нарасидааст», – гуфтанд дар мақомоти мазкур.
Gazprom International 7-уми декабри соли 2010 ба корҳои пармакунии чоҳи «Шаҳринав-1п» оғоз кард. Ҳаҷми сармоягузории ширкат барои анҷом додани корҳои иктишофии геологӣ дар майдонҳои нафтугаздори Тоҷикистон беш аз 5,6 млрд. рублро ташкил доданд. Барои идомаи корҳо дар соли 2013 ширкат 30 млн. $ маблағ равона мекунад. Аз оғози корҳо дар Тоҷикистон «Газпром» дар ин самт беш аз 140 млн. $ маблағгузорӣ кард.
Ёдрас мекунем, ки
ахири моҳи июни соли равон
ширкати Gazprom International корҳои пармакунӣ дар чоҳи «Шаҳринав-1п»-ро, ки дар майдони нафтугаздори Сариқамиш дар Тоҷикистон воқеъ аст, ба нуқтаи ниҳоӣ – 6300 метр расонид.
Ин рекорди нави мутлақи пармакунии чуқурӣ ба ин ҳадд дар таърихи пармакунии чоҳҳои нафту газ дар Осиёи Марказӣ мебошад. То имрӯз чоҳи нафти пастхамии Фарғона дар шимоли Ӯзбекистон (6112 метр) чуқуртарин чоҳ дар минтақа маҳсуб меёфт. Чоҳи чуқуртарини нафту газ дар Тоҷикистон «Каратау-1» (6101 метр) дар ҷануби ҷумҳурӣ мебошад, ки соли 1991 парма шудааст.
Ширкати «Газпром» барои баргузор намудани таҳқиқоти захираҳои зеризаминӣ дар Тоҷикистон ду иҷозатнома (майдонҳои Сариқамиш ва Шоҳамбарии Ғарбӣ) дорад.
Захираҳои пешакии газ дар минтақаи нафтугаздори Сариқамиш 18 млрд. метри мукааб, захираҳои нафт – 17 млн. тонна ва гази омехта дар нафт – 2 млрд. метри мукааб арзёбӣ мешаванд.
Ҳамкории ҶСК «Газпром» ва ҳукумати Тоҷикистон аз соли 2008 мутобиқи Созишнома дар бораи усулҳои умумии баргузории омӯзиши геологии захираҳо дар майдонҳои нафтугаздори Тоҷикистон ба роҳ монда шудааст.
Қобили зикр аст, ки талаботи Тоҷикистон ба гази табиӣ ҳудуди 1,2 млрд. метри мукааб дар як солро ташкил медиҳад. Аз рӯи натиҷаҳо соли 2012 дар Тоҷикистон 1,8 млн. метри мукааб газ истихроҷ шудааст.
