Имрӯз як силсила вохӯриҳои номзадҳо ба мансаби президенти Тоҷикистон ва шахсони боэътимоди онҳо бо интихобкунандагони вилояти Суғд ба итмом мерасад.
Роҳбари дастгоҳи КМИР Тоҷикистон Абдуманнон Додоев ба ОИ «Азия-Плюс» дар ин робита иттилоъ дод, ки нимаи имрӯз вохӯрии номзадҳо бо интихобкунандагони шаҳри Хуҷанд дар назар буда, нимаи дуюми рӯз чунин вохӯриҳо бо аҳолии ноҳияҳои Айнӣ, Кӯҳистони Мстчоҳ ва шаҳри Панҷакент доир мегарданд.
«Пагоҳ КМИР сабти мулоқотҳои номзадҳо бо аҳолӣ барои намоиш дар шабакаҳои давлатии телевизиони Тоҷикистонро дар нақша дошта, аз 26-уми октябр то 1-уми ноябр вохӯрии номзадҳо бо аҳолии ноҳияҳои водии Рашт, вилояти Хатлон ва Бадахшон баргузор мешаванд», – зикр кард Додоев.
Додоев хотиррасон намуд, ки бо қарори КМИР номзадҳо ба мансаби президентӣ ба суханронии 30-дақиқаинаи ройгон дар ҳар кадоме аз шабакаҳои давлатии телевизионӣ ҳуқуқ дошта, ба шахсони бовариноки номзадҳо низ дар ҳар кадоме аз шабакаҳои давлатии телевизионӣ 20 дақиқа эфир дода мешавад. «Ҳамчунин номзадҳо ҳуқуқ доранд, ки дар матбуотӣ расмӣ маълумот дар бораи барномаҳои пешазинихоботии худ дар ҳаҷми 10 саҳифаи чопӣ (шрифти 14)-ро низ ба нашр расонанд», – гуфт ӯ.
Зимнан зикр гардид, ки нимаи дуюми имрӯз КМИР ҶТ гурӯҳи навбатии нозирони байнулмилалӣ дар интихоботи президенти Тоҷикистонро ба қайд мегирад.
Дар Тоҷикистон аз 16-уми октябр расман маъракаи пешазинтихоботӣ ба мансаби президентӣ оғоз гардид. Интихобот рӯзи 6-уми ноябр доир мегардад. Айни замон ба сифати номзад ба мақоми президенти Тоҷикистон расман 6 нафар ба қайд гирифта шуданд. Инҳо президенти амалкунандаи ҷумҳурӣ Эмомалӣ Раҳмон, намояндаи Ҳизби аграрӣ академик Толиббек Бухориев, раиси Ҳизби ислоҳоти иқтисодӣ Олимҷон Бобоев, муовини раиси Ҳизби коммунист Исмоил Талбаков, раиси Ҳизби сотсиалистӣ Абдуҳалим Ғаффоров ва раиси Ҳизби демократии Тоҷикистон Саидҷаъфар Исмонов мебошанд.
