Вакилони палатаи поёнии парлумон лоиҳаи аз ҷониби ҳукумат пешниҳодшудаи Барномаи қарзи давлатии хориҷӣ барои солҳои 2014-2016-ро маъқул шумориданд.
Зимни шарҳи ин масъала ба вакилон дар иҷлосияи панҷуми Маҷлиси намояндагони Маҷлиси Олии ҶТ вазири молияи ҶТ Сафаралӣ Наҷмиддинов изҳор намуд, ки Барнома пеш аз ҳама ба рушди бахши кишоварзӣ, энергетика ва соҳаи иҷтимоӣ нигаронида шудааст.
Ба гуфтаи вазир, соли оянда ҳукумати ҷумҳурӣ ба иқтисоди кишвар дар ҳаҷми 168,2 млн. $, соли 2015 – 127,7 млн. $ ва соли 2016 – 81,7 млн. $ қарзи хориҷӣ ҷалб карданист, ки тӯли се соли оянда дар маҷмӯъ 371,6 млн. доллари ИМА-ро ташкил медиҳад.
Вазир қайд кард, ки аз ҳаҷми умумии қарзҳои ҷалбшуда 48 млн. $ ба рушди бахши кишоварзӣ, 19,8 млн. $ ба соҳаи тандурустӣ, 15,1 млн. $ ба соҳаи маориф, 115 млн. $ ба рушди бахши энергетика ва 47 млн. $ ба соҳаи нақлиёту коммуникатсия равона хоҳад шуд. «Ҳамаи қарзҳо бо шартҳои имтиёзнок пешниҳод хоҳанд шуд», – таъкид дошт ӯ.
Ғайр аз ин, ба қавли Наҷмиддинов, давоми солҳои 2014-2016 ҳукумат аз ниҳодҳои байнулмилалии молиявӣ ва кишварҳои ҷудогона ба маблағи 642 млн. $ бурсҳо дастрас карданист.
Вазири молия зикр кард, ки айни замон ҳаҷми қарзи хориҷии Тоҷикистон 1,2 млрд. доллари ИМА-ро ташкил дода, қарздиҳандагони асосӣ ба Тоҷикистон Бонки ҷаҳонӣ, Бонки осиёгии рушд, Бонки исломии рушд, Бонки аврупоии таҷдиду рушд ва Эксимбонки Чин мебошанд.
