Бо пешниҳоди ҳукумат Маҷлиси намояндагони Маҷлиси Олии ҷумҳурӣ имрӯз ба нишондиҳандаҳои буҷети давлатии соли 22014 тағийроти навбатӣ ворид мекунад.
Узви Кумита оид ба молия ва буҷети палатаи поёнии парлумон Исмоил Талбаков ба ОИ «Азия-Плюс» дар ин робита иттилоъ дод, ки ин дафъа ҳукумат дархост кардааст, ки воридоти бланкаҳои шиносномаҳои биометрӣ ва кортҳои идентификатсионӣ (корти шиносоӣ, IDcard) ва ҳамчунин таҷҳизот барои пур кардани онҳо, ки воридоти онҳо аз ҷониби Вазорати корҳои хориҷӣ сурат мегирад, аз андоз аз арзиши изофа ва боҷи гумрукӣ озод карда шаванд.
«Пешниҳоди худро ҳукумат бо он асоснок мекунад, ки дар сурати аз пардохти андоз аз арзиши изофа ва боҷи гумрукӣ озод шудани воридоти бланкаҳо ва кортҳо бо теъдоди умумии 600 ҳазор дона, нархи онҳо коҳиш меёбад», – зикр кард Талбаков.
Ба қавли ӯ, аз пардохти андоз аз арзиши изофа ва боҷи гумрукӣ озод шудани воридоти бланкаҳо ва кортҳо ба буҷети давлатӣ дар ҳаҷми умумии 18 млн. 825 ҳазор сомонӣ маблағи даромад ворид намешавад.
