Имрӯз зимни баррасии шикояти кассатсионии адвокатҳои Зайд Саидов ҷониби айбдоркунанда сухани ниҳоии худро изҳор кард.
Тавре ба «Азия-Плюс» Шуҳрат Қудратов, яке аз адвокатҳои соҳибкор хабар дод, Маҳмадвалӣ Исоев, намояндаи Суди олӣ изҳор кардааст, ки ҳукми содиршуда нисбати Зайд Саидов аз ҷониби судяи Суди олӣ Шавкат Абдулхайров қонунӣ аст ва пешниҳод намудааст, ки он бетағйир боқӣ гузошта шавад.
Адвокат ҳамчунин зикр кард, ки намояндаи айбдоркунанда пешниҳоди шикояти кассатсионӣ нисбати ҳукми судро, ки 25-уми декабри соли гузашта соир шуда буд, ғайриқонунӣ унвон кардааст.
«Дар робита ба шикояти кассатсионӣ мо ҳеҷ тағйироти ҷиддиеро интизор нестем, зеро ман дар таҷриба дидаам, ки ҳангоми баррасии шикоят ҳамеша мавқеи айбдоркунандаҳо дастгирӣ карда мешавад», – иброз дошт Қудратов.
Адвокатҳои Зайд Саидов, зимни баррасии шикояти кассатсионӣ рӯзи 6-уми май бори дигар изҳор намуданд, ки ҳукми нисбати зерҳимояи онҳо содиршуда аз ҷониби судяи Суди олӣ Шавкат Абдулхайров беасос ва бепоя аст. Шуҳрат Қудратов ҳамроҳ бо адвокати дигар Исҳоқ Табаров дар суд бо далелҳои бегуноҳии зерҳимояашон суханронӣ карданд. «Мо тамоми далелҳои бегуноҳии Зайд Саидовро пешниҳод кардем», – таъкид дошт Қудратов.
Ба гуфтаи адвокат, пас аз шунидани сухани ниҳоии ҷониби айбдоркунанда суд ба хонаи машваратӣ хориҷ шуда, акнун интизорӣ меравад, ки баъди як ҳафта нисбати ҳукм қарори ниҳоии худро содир намояд.
Қудратов зикр кард, ки соҳибкори маҳкумшуда Зайд Саидов дар ҳар як ҷаласаи суд изҳор мекунад, ки тамоми айбномаҳо нисбати ӯ туҳмат буда, ҳукм ғайриқонунӣ аст.
Ҷаласаи аввал оид ба баррасии шикояти кассатсионии адвокатҳои соҳибкори ба 26 соли зиндон маҳкумшуда санаи 15-уми апрел доир гардида буд. Шикоятро ба Суди олӣ адвокатҳо 30-юми декабри соли 2013 пешниҳод карда буданд.
Ёдрас мекунем, ки санаи 25-уми декабри соли 2013 соҳибкори шинохта Зайд Саидов ба муҳлати 26 соли зиндони низомаш шадид маҳкум шуд. Зайд Саидов аз рӯйи панҷ моддаи Кодекси ҷиноятии ҶТ – 138 (Таҷовуз ба номус), 131 (Ғайриқонунӣ маҳрум кардан аз озодӣ), 170 (Дузанагӣ ё серзанагӣ), 139 (Гирифтани пора) ва 247 (Қаллобӣ) гунаҳкор дониста шуд. Аз рӯи дигар моддаҳои пешниҳодшуда суд ҷиҳати тафтишоти дубора таъинот содир намуд, зеро тибқи ин моддаҳо айби Саидов собит карда нашуд.
Мурофиаи судӣ нисбат ба Зайд Саидов рӯзи 12-уми сентябр оғоз гардида, пушти дарҳои баста дар бинои тавқифгоҳи тафтишотии (СИЗО)-и КДАМ ҷараён дошт.
Роҳбари гурӯҳи ташаббускори таъсиси ҳизби «Тоҷикистони нав» Зайд Саидов рӯзи 19-уми май дарҳол пас аз бозгашт аз Аврупо дар фурудгоҳи пойтахт боздошт шуда, ба Агентии зиддифасод мунтақил гардид.
Агентии назорати давлатии молиявӣ ва мубориза бо коррупсия рӯзи 2-юми август дар бинои тавқифгоҳи КДАМ ба Зайд Саидов мутобиқи моддаҳои 319 (Гирифтани пора), 247 (Қаллобӣ), 170 (Дузанагӣ ё серзанагӣ), 250 (Тамаъҷӯӣ), 314 (Суистифодла аз ваколатҳои мансабӣ), 138 (Таҷовуз ба номус), 141 (Алоқаи ҷинсӣ бо шахсе, ки ҳануз ба синни 16-солагӣ нарасидааст) ва 124 (Ба исқоти ҳамл маҷбур сохтани зан)-и Кодекси ҷиноятии ҶТ айбнома пешниҳод кард.
