Рӯзи 22-юми июл Вазири корҳои дохилӣ генерал-лейтенанти милитсия Раҳимзода Рамазон Ҳамро ба Ротаи зарбазани Дастаи таъиноти махсуси милитсияи ВКД Ҷумҳурии Тоҷикистон ташриф оварда, аз шароити хизматӣ, маишию иҷтимоии хизматчиёни ин ниҳод дидан намуд.
Бино ба иттилои маркази матбуоти ВКД ҶТ, ротаи мазкур моҳи октябри соли 2012 дар ҳайати Дастаи таъиноти махсуси милитсияи ВКД Ҷумҳурии Тоҷикистон таъсис дода шуда, яке аз ҷузъҳои муҳими воҳидҳои таъиноти махсуси Вазорати корҳои дохилӣ ба ҳисоб меравад.
Ба иттилои манбаъ, бо ташаббуси роҳбарияти Вазорати корҳои дохилӣ ва бо дастгирии соҳибкорони маҳаллӣ шароити хизматӣ, маишию иҷтимоии Ротаи зарбазан беҳтару хубтар гардида истодааст. Аз ҷумла, дар як муддати кӯтоҳ барои ҳайати шахсии Ротаи мазкур аз ҷониби соҳибкорони маҳаллӣ ҳамоми замонавӣ, майдони сафороӣ ва майдонча барои бозиҳои варзишии волейбол бунёд карда шуданд.
«Рамазон Раҳимзода аз ошхона, ҳамом, ҷойи хоб (казарма) ва дигар шароити хизматию маишии афсарону хизматчиёни Рота аз наздик шинос гардида, барои боз ҳам ободу зебо гардонидани иншоотҳои Рота ва атрофи он ба шахсони масъул дастуру супоришҳои мушаххас дод», – омадааст дар иттилои ВКД.
Гуфта мешавад, зимни боздид вазир дар назди ҳайати шахсии Ротаи зарбазани Дастаи таъиноти махсуси милитсия суханронӣ намуда, афсарону хизматчиёни Ротаро ба далерию шуҷоат ва мардонагию матонат ҳидоят намуд.
