Ба ҷурми изофанависӣ дар кишти картошка се раиси ҷамоати ноҳияи Ҷалолиддини Руми аз вазифаҳои худ барканор шуданд.
Раиси ноҳияи Ҷалоддини Румӣ Маҳмадраҳим Исмоилов дар ин робита изҳор намуд, ки ба хотири изофанависӣ се нафар раисони ҷамоатҳои деҳоти Фрунзе, Калинин ва Гулистон аз вазифаҳои худ озод карда шуданд.
«Аслан бигирем ин изофанависӣ набуд, зеро кишти картошка дар майдоне, ки онҳо қаблан ҳисобот дода буданд гузаронида шуда буд. Аммо ҳамагӣ медонанд, ки имсол зимистон бисёр сард омаду қисми зиёди маҳсулотҳои барвақтиро сармо зад. Аз ҷумла картошка ҳам зарари ҷиддӣ дид. Вале вақте ки санҷиши кишти картошка гузаронида шуд, қисми майдонҳои кишти картошка вайрон карда шуда буд ва ба ҷои онҳо дигар зироатҳо кишт шуда, онро дар назари аввал ба ҳисоб нагирифтанд», – иброз дошт ӯ.
Ба қавли раиси ноҳия, баъдан санҷишҳои ҷиддӣ нишон додаанд, ки воқеъан ин нафарон изофанависӣ накарда, балки дар масъалаи пешниҳодҳои ҳисобот хунукназарӣ кардаанд. «Аз ин хотир раисони ҷамоатҳо аз взифаҳои худ барканор шуданд», – афзуд номбурда.
Бояд ёдовар шуд, ки раиси вилояти Хатлон Давлатшоҳ Гулмаҳмад зимни як нишасти матбуотӣ изҳор намуда буд, ки дар вилоят барои изофанависӣ 56 нафар шахсони мансабдор ба муҷозот кашида шуданд, аз ҷумла 46 нафари онҳо аз вазифаҳои хизматиашон барканор шудаанд.
