Вазири корҳои хориҷии Русия Сергей Лавров, ки бо сафари корӣ дар Тоҷикистон қарор дорад, изҳор намуд, ки дарҳои Иттиҳоди иқтисодии Авруосиё ҷиҳати узвият барои дигар кишварҳои Иттиҳоди давлатҳои Мустақил, аз ҷумла Тоҷикистон боз аст.
Ӯ қайд кард, ки ояндаи наздик Арманистон узви комилҳуқуқи Иттиҳоди иқтисодии Авруосиё гардида, бо Қирғизистон дар ин самт гуфтушунидҳо ҷараён доранд. «Ҳамроҳшавӣ ба ҷараёни ҳамгиройӣ ба таҳкими афзалияти рақобатпазирии кишварҳои узви Иттиҳод шароити мусоид фароҳам оварда, ба рушди иқтисоди кишварҳо такони ҷиддӣ мебахшад», – иброз дошт Лавров.
Вазири корҳои хориҷии Русия таъкид намуд, ки таҳкими робитаҳо бо шарикон аз кишварҳои ИДМ самти калидии стратегии сиёсати хориҷии Русия барои давраи дарозмуҳлат маҳсуб меёбад.
Ёдрас мекунем, ки 29-уми майи соли равон Русия , Беларус ва Қазоқистон дар шаҳри Остона шартнома дар бораи таъсиси Иттиҳоди иқтисодии Авруосиёро ба имзо расониданд, ки аз 1-уми январи соли 2015 мавриди амал қарор мегирад. Таъсиси Иттиҳоди мазкур барои ба сатҳи бештар баландтари ҳамгиройӣ баромадани кишварҳои узви Иттиҳоди гумрукӣ мусоидат мекунад.
