Дар сафари қарибулвуқӯъи раиси Ҷумҳурии Мардумии Чин Си Ҷинпин ба Тоҷикистон ӯро як гурӯҳи афсарони воломақоми Артиши мардумии озодихоҳои Чин ҳамроҳӣ хоҳанд кард.
Тавре як манбаъ аз ҳукумати ҷумҳурӣ хабар дод, дар назар аст, ки низомиёни Чин барои Вазорати мудофиаи Тоҷикистон як миқдор кумаки техникиро хоҳанд супурд.
«Дар доираи сафари сарвари давлати Чин ба Душанбе мавриди баҳрабардорӣ қарор гирифтани Хонаи афсарони Вазорати мудофиаи ҶТ дар шаҳри Душанбе дар назар аст, ки комилан аз ҳисоби маблағҳои бурсии Чин сохта шудааст», – гуфт манбаъ.
Ба иттилои манбаъ, дар маросими ифтитоҳи Хонаи афсарон, ки дар паҳлӯи бинои марказии Вазорати мудофиа қомат меафрозад, ҳамчунин сарвари давлати Тоҷикистон Эмомалӣ Раҳмон низ ширкат меварзад.
Ёдрас мекунем, ки сохтмони Хонаи афсарон дар шаҳри Душанбе моҳи июни соли 2012 оғоз гардида, барои бунёди он Чин ба сифати бурс 90 млн. юан (тақрибан 14 млн. доллари ИМА) маблағ ҷудо кард.
