Сафорати Тоҷикистон дар Русия ҷараёни тафтиши ҳодисаи муноқишаву занозанӣ миёни таксиронҳо дар назди бозори «Садовод»-и шаҳри Маскавро, ки рӯзи 6-уми сентябр ба вуқӯъ пайваст, таҳти назорат гирифта, бо супориши сафир Имомудиин Сатторов кормандони сохторҳои дахлдор ҷиҳати таҳқиқи ҳолатҳои қазия ба ҷойи ҳодиса сафарбар шудаанд.
Тавре ба «Азия-Плюс» котиби матбуоти намоядагии Хадамоти муҳоҷирати ҶТ дар Русия Иброҳим Аҳмадов хабар дод, муноқиша миёни ронандагони ширкати «Желтое такси» ва таксиронҳои хусусӣ, ки аксарашонро шаҳрвандони Тоҷикистон ташкил медиҳанд, рух дода, ба занозании дастаҷамъона табдил ёфтааст ва чанде аз таксиронҳо ҷароҳатҳои ҷисмонӣ бардошта, 40 нафар ба шуъбаи пулис мунтақил шудаанд.
Ба гуфтаи яке аз таксиронҳо бо исми Алишер, рақобат миёни ронандагони ширкати «Желтое такси» ва таксиронҳои хусусӣ қаблан ҳам ҷой дошта, вале то муноқишаву занозании дастаҷамъона нарасидааст ва шояд доираҳое мавҷуданд, ки ба иғовагариҳо атрофи бозори «Садовод» манфиатдоранд, ҳарчанд муноқиша берун аз қаламрави бозор ба вуқӯъ пайвастааст.
Қобили зикр аст, ки чанд рӯз қабл ҳамроҳ бо кормандони намояндагии Хадамоти муҳоҷират вакили палатаи поёнии парлумони Тоҷикистон Сабоҳат Муқимова аз маркази савдои «Садовод» боздид намуда, бо муҳоҷирони кории тоҷик мулоқот ороста буд.
