Бо мақсади пурзӯр намудани мубориза бар зидди гардиши ғайриқонунии маводи нашъаовар дар маркази ноҳияи Қубодиён ҷаласаи Ситоди байниноҳиявии сайёри амалиёти “Кӯкнор-2014” баргузор гардид, ки дар кори он муовинони раисони ноҳияҳои Ҷиликӯл, Қубодиён, Шаҳритус ва Носири Хисрав иштирок намуданд.
Бино ба иттилои шуъбаи робита бо ҷомеаи Агентии назорати маводи нашъаовар, инчунин дар маркази шаҳри Норак ҷаласаи сайёри байниноҳиявии оперативӣ баргузор гардид, ки дар кори он муовинони раисони ноҳияҳои “Ёвон, А. Ҷомӣ ва Хуросони вилояти Хатлон иштирок намуданд.
Дар ноҳияи Қумсангир низ ҷаласаи сайёри оперативӣ баргузор гардид, ки дар кори он муовинони раисони ноҳияҳои Панҷ, Қумсангир ва Ҷ. Румӣ иштирок намуданд.
Сардори Раёсати Агентии назорати маводи нашаъаовари назди Президенти Ҷумҳурии Тоҷикистон дар вилояти Хатлон полковник М. Хайруллозода вобаста ба ҷинояткории алоқаманд ба маводи нашъаовар сухан намуда, иброз дошт, ки дар ноҳияҳои наздисарҳадии вилоят ҳодисаҳои даст доштан ба муомилоти ғайриқонунии маводи нашъаовар зиёдтар ба қайд гирифта мешаванд. Дар баромадҳо қайд гардид, ки мубориза бар зидди муомилоти ғайриқонунии маводи нашъаовар ин танҳо вазифаи мақомоти қудратӣ намебошад, тамоми ҷомеа бояд бар зидди ин падидаи номатлуб саҳми арзандаи худро гузорад.
Дар ҷаласаҳо масъалаҳои ҳамоҳангсозии фаъолияти мақомоти ҳифзи ҳуқуқ ва сохторҳои қудратии вилоят оид ба ташкил намудани иҷроиши қарори Дастгоҳи иҷроияи Президенти ҶТ ва нақшаи ташкил ва гузаронидани амалиёти “Кӯкнор-2014 камбудиҳои ҷойдошта дар рафти кор ва роҳҳои ислоҳи онҳо, инчунин фаъол гардонидани кор дар самти пешгирии нашъамандӣ ва ҷинояткорӣ мавриди баррасӣ қарор гирифтанд.
