Иёлоти Муттаҳидаи Амрико аз қарори номзадҳо ба мақоми раиси ҷумҳури Афғонистон доктор Абуллоҳ Абдуллоҳ ва доктор Ашраф Ғаниро ҷиҳати ба имзо расонидани тавофуқномаи ташкили давлати ваҳдати миллӣ истиқбол мекунад.
Дар изҳороти имрӯз интишорнамудаи сафорати ИМА дар Тоҷикистон дар ин робита зикр мегардад, ки имзои ин тавофуқномаи сиёсӣ ба хатми бӯҳрони сиёсӣ дар Афғонистон мусоидат намуда, дар амалӣ намудани нақшаҳои навбатӣ эътимод ба даст меоварад ва ИМА тавофуқномаи мазкурро дастгирӣ намуда, омода аст, ки бо роҳбарияти нав барои ба фаъолияти бомуввафақият ноил гаштан ҳамкорӣ намояд.
«Ҳарду номзад дар Баёния Муштарак аз таърихи 8 августи изҳор намуданд, ки мардуми Афғонистон сазовори Ҳукумати қонунӣ ва босамар мебошад, ки то барои кишварашо ояндаи дурахшонро фароҳам оваранд. Миллион шаҳрвандони афғон ба таҳдидҳо ва носуботиҳо нигоҳ накарда, ба доктор Абдуллоҳ ва доктор Ғанӣ раъйи худро доданд. Тавофуқномаи мазкур азми дастаҷамъонаи мардуми Афғонистонро пайгирӣ мекунад. Барои ба ин тавофуқ ноил гаштан сари роҳи ҳарду ҷониб ниҳоят интихоби мушкил омад, барояшон лозим шуд, ки омодагии худро ҷиҳати ҳамкорӣ ва созиш кардан сари масъалаҳои зиёд зоҳир кунанд. Натиҷаи гуфтушуниди онҳо ниёзи мардуми афғонро нисбат ба сиёсат ё иззати шахсии ҳокимиятдорӣ дар мадди аввал мегузорад», – омадааст дар изҳороти мазкур.
Гуфта мешавад, ин тавофуқнома имконияти муҳимро ҷиҳати муттаҳидӣ ва сулҳу субот дар Афғонистон дарҷ мекунад. «Мо аз мардуми афғон, аз ҷумла аз роҳбарони ҷомеаҳои сиёсӣ, динӣ ва шаҳрвандӣ даъват ба амал меоварем, ки ин тавофуқномаро ҷонибдорӣ кунанд ва ҷиҳати ҳамкорӣ ва таъмини сулҳ ба ҳам оянд», – қайд мешавад дар изҳорот.
Зимнан зикр мегардад, ки риояи раванди демократӣ –ин як роҳи ниҳоят муҳимест барои Афғонистон ба сӯи ояндаи бехатар ва босубот; он аз дастгирии мунтазами ИМА ва ҷомеаи ҷаҳонӣ шаҳодат медиҳад.
«Мо хатми раванди интихобот, натиҷаи онро, қасамёдкунии Раиси ҷумҳури нав, таъин гардидани раиси иҷроӣ, ба имзо расидани Созишномаи дуҷониба оид ба амният, Созишномаи НАТО оид ба мақоми қувваҳои мусаллаҳро, ки шарикии стратегӣ ва ӯҳдадориҳои моро ҷиҳати дастгирӣ намудани ояндаи босуботи Афғонистон мустаҳкам менамояд, бесаброна интизорем», – баён мегардад дар хотима.
Дар ҳамин ҳол, қаблан Вазорати корҳои хориҷии Тоҷикистон аз ба имзо расидани тавофуқномаи ташкили давлати ваҳдати миллӣ дар Афғонистон истиқбол намуд.
Роҳбари департаменти иттилоот ва таҳлили ВКХ Тоҷикистон Абдулфайз Атоев дар ин робита изҳор кард, ки Тоҷикистон аз ҳосил шудан тавофуқ миёни пешвоёни нави Афғонистон, ки баҳри сулҳу субот дар ин кишвар зарур аст, истиқбол мекунад.
«Нисбат ба дигар кишварҳо Тоҷикистон ба таъмини сулҳу субот дар Афғонистон, ки марзаш бо ин кишвар 1370 километрро ташкил медиҳад, бештар манфиатдор аст», – қайд кард Атоев.
