Раиси Ҳизби наҳзати исломии Тоҷикистон, вакили палатаи поёнии парлумон Муҳиддин Кабирӣ имрӯз аз шаҳри Кӯлоб боздид намуда, дар бинои мақомоти шаҳрдорӣ ва дафтари кории ҲНИТ бо интихобкунандагон ва аъзои ҳизб мулоқот орост.
Қобили зикр аст, ки ин сафари нахустин ба Кӯлоб баъди ба сӯи ӯ партофтани тухму помидор рӯзи 10-уми июни соли ҷорӣ дар ин шаҳр аст.
Маҳмудҷон Файзраҳмонов, сухангӯи ҲНИТ ба «Азия-Плюс» дар ин робита иттилоъ дод, ки зимни вохӯриҳои имрӯза Муҳиддин Кабирӣ изҳор намудааст, ки ҳодисаи моҳи июн дар Кӯлоб ба аҳолии ин шаҳр ҳеҷ муносибате надошта, «он аз ҷониби касоне созмон дода шуда буд, ки ба миллати тоҷик муносибате надоранд».
«Раиси ҲНИТ зикр кард, ки миёни ӯ ва аҳолии шаҳри Кӯлоб ҳеҷ гоҳ нофаҳмие вуҷуд надошт ва сафари кунунии ӯ инро тасдиқ мекунад», – гуфт сухангӯи ҲНИТ.
Ёдрас мекунем, ки
санаи 10-уми июн
ҳангоми аз дафтари кории ҳизб ба берун баромадани раиси ҲНИТ Муҳиддин Кабирӣ пас аз вохӯрӣ бо ҷавонони маҳаллӣ дар Кӯлоб, чанд нафаре ба сӯи ӯ тухми мурғу помидор партофтанд.
Дар робита ба ҳодисаи ҳамла ба раиси Ҳизби наҳзати исломии Тоҷикистон Муҳиддин Кабирӣ Шӯрои сиёсии ҲНИТ
изҳороти расмӣ
интишор намуд.
Кормандони милисаи шаҳри Кӯлоб ду нафар гумонбаршудагон ба амали майдаавбошӣ нисбати раиси ҲНИТ Муҳиддин Кабириро, ки ки санаи 10-уми июн содир гардида буд,
боздошт намуданд.
Иттилоъ дода шуд, ки боздоштшудагон сокинони Кӯлоб набуда, парвандаи маъмурии нисбати онҳо оғозгардида аллакай ҷиҳати баррасӣ ба суд фиристода шудааст.
