Ширкати ҳавопаймоии тоҷикистонии Asian Express Airlines рӯзи 29-уми сентябр тариқи ҳавопаймои Боинг 737-400 парвози нахустин аз Душанбе ба шаҳри Астрахани Русия ва аз он ҷо бозпас ба пойтахти Тоҷикистонро анҷом дод.
Тавре аз ширкати мазкур хабар доданд, парвоз ба ин самт як маротиба дар 14 рӯз сурат гирифта, нархи билет ба як самт тавассути ин хатсайр 1400 сомониро ташкил медиҳад. «Ҳавопаймоҳо барои анҷоми парвозҳоро ширкат аз ҶСК «Тоҷик Эйр» ба лизинг мегирад», – гуфтанд дар ширкати ҳавопаймоӣ.
Ба иттилои манбаъ, ҳавопаймоҳои Asian Express Airlines айни замон ба муоинаву азназаргузаронии иловагӣ эҳтиёҷ доранд, зеро муддати тӯлонӣ дар истгоҳҳо қарор доштанд. «Пас аз анҷоми ин корҳо мо ба истифодаи онҳо шурӯъ мекунем», – шарҳ доданд дар ширкат.
Зимнан зикр гардид, ки аз 1-уми октябр ширкати ҳавопаймоӣ ба анҷом додани парвозҳо тавассути хатсайри Хуҷанд – Барнаул низ оғоз мекунад.
