Сафорати Иёлоти Муттаҳида озмуни Хазинаи сафиронро оид ба ҳифзи мероси фарҳангӣ (ХСҲМФ) кушода эълон менамояд.
Тавре аз сафорати ИМА дар ҶТ хабар доданд, ХСҲМФ барномаҳоро аз қабили барқарор намудани иморатҳои бостонӣ ва таърихӣ, арзёбӣ ва ҳифзи дастнависҳои нодир ва нигораҳои осорхонаҳо, нигоҳ доштан ва ҳифз намудани мавзеҳои муҳими бостонӣ, сабту хуҷҷатгузорӣ намудани ҳунарҳои миллӣ ва забонҳои маҳаллӣ, ки зери хатари нестшавӣ қарор гирифтаанд дастгирӣ менамояд.
Гуфта мешавад, Хазинаи сафирон оид ба ҳифзи мероси фарҳангӣ дар соли 2001 ҷиҳати нигоҳ доштани мероси фарҳангӣ ва зоҳир намудани эҳтироми ИМА нисбат ба фарҳангҳои ғайр таъсис дода шудааст. Мероси фарҳангӣ нишонаест аз саҳмгузорӣ ва таҷрибаи таърихии башарият. То ба имрӯз сафорати Иёлоти Муттаҳидаи Амрико таввасути гранти ХСҲМФ 15 барномаро дар Тоҷикистон ба маблағи зиёда аз 540000 доллари амрикоӣ дастгирӣ намудааст.
Зимнан зикр мегардад, ки 12 ноябри соли ҷорӣ машварати иттилоотӣ роҷеъ ба барномаи мазкур дар Гӯшаи Амрико вокеъ дар Китобхонаи милли дар ошёнаи 4-ум баргузор мегардад. Ташкилотҳое, ки нияти дар озмун иштирок карданро доранд, метавонанд дар машварати мазкур иштирок намоянд. Маълумоти муфассал дар ин хусус дар сомонаи
http://dushanbe.usembassy.gov/amb_fund.html
қобили дарёфт аст.
Мӯҳлати охирини супоридани ҳуҷҷатҳо 28 ноябри 2014 мебошад. Ҳуҷҷатҳои супурда аз рӯзи пешниҳод шуданашон таҳти баррасӣ қарор хоҳанд гирифт. . Пешниҳоди ҳуҷҷатҳо пеш аз муҳлати ниҳоӣ қобили қабул аст.
