Рӯзҳои 12-13-уми ноябр дар бинои театри драмавии шаҳри Ботканди Қирғизистон намоишгоҳ-фурӯши маҳсулоти истеҳсолкунандагони вилоятҳои Суғду Ботканд доир гардид.
Мудири шуъбаи Раёсати сармоягузорӣ ва идораи амволи давлатии ҳукумати вилояти Суғд Руслан Шодиев ба «Азия-Плюс» дар ин робита иттилоъ дод, ки ин чорабинӣ қадами нахуст дар самти амалисозии Нақшаи муштараки ҳамкорӣ миёни вилоятҳои Суғду Ботканд давоми солҳои 2014-2017 аст, ки раисони вилоятҳо санаи 7-уми ноябр дар шаҳри Хуҷанд ба имзо расонида буданд.
«Намоишгоҳ дар доираи лоиҳаи Ҷамъияти Олмон оид ба рушди байнулмилалӣ (GIZ) – «Мусоидат ба савдои наздимарзӣ» бо дастгирии Раёсати сармоягузорӣ ва идораи амволи давлатии ҳукумати вилояти Суғд созмон дода шуд», – иброз дошт ӯ.
Ба гуфтаи ӯ, дар намоишгоҳ маҳсулоти беш аз 25 корхонаҳои хурд ва миёнаи вилояти Суғд ба маърази тамошо гузошта шуда, дар як муддати кӯтоҳ ҳамаи молу маҳсулот аз ҷониби аҳолии маҳаллӣ харида шуд, ки гувоҳи талаботи зиёд ба маҳсулоти корхонаҳои вилояти Суғд мебошад.
«Соҳибкорони тоҷик аз шаҳри Хуҷанд дар намоишгоҳ ҳамчунин 10 навъи масолеҳи сохтмонро пешниҳод намуда, миёни ширкати як соҳибкори тоҷик оид ба таъмини масолеҳи сохтмон барои сохтмон ва азнавсозии маҷмааи варзишӣ дар шаҳри Ботканд қарордод ба имзо расид», – афзуд номбурда.
