Роҳи мошингард тариқи ағбаи Хобуробот, ки пойтахти кишварро тавассути ноҳияи Тавилдара бо ВМКБ мепайвандад, барои ҳаракати нақлиёт баста шуд.
Чуноне ки ба «Азия-Плюс» аз Вазорати нақлиёти ҷумҳурӣ хабар доданд, роҳи мошингард бинобар сабаби боришоти зиёди барф дар ин минтақа баста шуда, акнун танҳо нимаи моҳи майи соли оянда ҳаракати нақлиёт тариқи ин ағба барқарор мешавад.
Бино ба иттилои манбаъ, дар давраи баста будани роҳ тариқи ағба ҳаракати нақлиёт аз маркази ҷумҳурӣ ба ВМКБ тавассути роҳи мошингарди Душанбе-Кӯлоб-Шӯрообод-Дарвоз-Хоруғ сурат мегирад.
Зимнан зикр гардид, ки ҳаракати воситаҳои нақлиёт дар дигар роҳҳои мошингарди кишвар тариқи ағбаҳои баландкӯҳ айни замон тибқи реҷаи муқаррарӣ амалӣ мешавад.
