Суди ноҳияи Исмоили Сомонии пойтахт муддати чор моҳ аст, ки ба шикояти ҳамсари соҳибкори маҳкумшуда Зайд Саидов дар робита ба аз оилаи онҳо мусодира шудани маркази савдои «Пойтахт», ки таҳти ҳабси давлат қарор дорад, ҳеҷ посухе намедиҳад.
Ёдрас мекунем, ки бар асоси қарори Суди олии Тоҷикистон аз 25-уми декабри соли 2013, маркази савдои «Пойтахт» дар баробари дигар амволи Зайд Саидов мусодира шуда буд.
Исҳоқ Табаров, адвокати Зайд Саидов ба «Азия-Плюс» дар ин робита иттилоъ дод, ки дар шикояти кассатсионии Латофат Тоҳирова, ҳамсари Зайд Саидов, ки аввали моҳи сентябр ба суди ноҳияи Исмоили Сомонӣ равона гардида буд, ӯ талаб кард, ки қарор дар бораи ҳабси бино бекор карда шавад. «Зайд Саидов танҳо ба 49%-и саҳмияҳои ин бино молик буда, онҳо бояд ба номи ӯ гузаронида шаванд», – гуфт адвокат ва илова намуд, ки қонунгузории Тоҷикистон барои ба номи ҳамсар гузаронидани нисфи амволи мавриди мусодира қароргирифта иҷозат медиҳад.
Дар ҳамин ҳол, Табаров қайд кард, ки муддати зиёда аз ним сол аст, ки даромадҳо аз фаъолияти маркази савдои «Пойтахт» ба суратҳисоби Агентии назорати давлатии молиявӣ ва мубориза бо коррупсияи ҷумҳрӣ ворид мешаванд.
«Нисфи бинои маркази савдои «Пойтахт» дар Душанбе аз ҷониби зерҳимояи ман аз ҳисоби сармоягузории шарикии русиягии ӯ ва нисфи дигараш аз маблғҳои дар Русия ба сифати соҳибкор бадастовардаи Зайд Саидов сохта шудааст, – иброз дошт адвокат. – Бинои шашошёнаи марказ, ки дар наздикии варзишгоҳи «Спартак» сохта шудааст, ба ширкати «Рос Азия Инвест» мутааллиқ аст. Танҳо 49%-и саҳмияҳо он ба Зайд Саидов ва 51%-и он ба писари Олег Сосковетс, собиқ муовини нахуствазири Русия тааллуқ доранд».
Ёдрас мекунем, ки соли 2010 дар маросими ифтитоҳи маркази мазкур Эмомалӣ Раҳмон ва раиси шаҳри Душанбе Маҳмадсаид Убайдуллов ҳузур доштанд.
Қаблан адвокатҳои Зайд Саидов дар бораи
ғасби рейдерии
амволи мутааллиқ ба соҳибкори маҳкумшуда хабар дода буданд.
