Тибқи пешгӯии Комиссияи марказии интихобот ва раъйпурсӣ (КМИР)-и Тоҷикистон, ҷиҳати иштирок дар маъракаи интихобот ба палатаи поёнии парлумони Тоҷикистон беш аз 500 нафар нозирони байнулмилалӣ ба ҷумҳурӣ ташриф меоранд.
Роҳбари дастгоҳи КМИР Тоҷикистон Абдуманнон Додозода ба «Азия-Плюс» дар ин робита иттилоъ дод, ки дар маъракаи интихоботи президенти Тоҷикистон санаи 6-уми ноябри соли гузашта 502 нафар нозирони байнулмилалӣ ҳузур доштанд.
«Шурӯъ аз рӯзҳои аввали Соли нав тариқи Вазорати корҳои хориҷии ҶТ КМИР ба унвони Кумитаи иҷроияи ИДМ, Созмони ҳамкории Шанхай, Ассамблеяи байнипарлумонии ИДМ, Ассамблеяи байнипарлумонии СААД, САҲА ва як қатор кишварҳо ҷиҳати иштирок дар интихоботи парлумонии Тоҷикистон даъватнома мефиристад», – гуфт номбурда.
