Ҳукумати Тоҷикистон лоиҳаи тағйироту илова ба Кодекси гумруки кишварро ба баррасии палатаи поёнии парлумон ирсол кард.
Вакили Маҷлиси намояндагони Маҷлиси Олии ҶТ, узви Кумитаи молия ва иқтисоди парлумон Шарофиддин Сироҷов ба «Азия-Плюс» дар ин робита иттилоъ дод, ки мутобиқи тағйироту иловаҳои пешниҳодшуда, воридоти сангҳои қиматбаҳо ва металлҳо аз ҷониби Бонки миллӣ ва Вазорати молия, доруворӣ ва ҳама гуна асъор аз ҷониби тамоми шахсон аз пардохти боҷи гумрукӣ озод карда мешаванд.
«Ғайр аз ин, ба Хадамоти гумруки назди ҳукумати ҶТ минбаъд барои ба таъхир андохтани пардохти боҷи гумрукӣ ба шахсони ҳуқуқии ҷудогона ҳуқуқ дода мешавад», – гуфт вакил.
Тағйироту иловаҳои зикршуда дар ҷаласаи навбатии иҷлосияи шашуми палатаи поёнии парлумон нимаи дуюми имрӯз баррасӣ мешавад.
