Наздики 950 ҳазор муҳоҷирони кории тоҷики муқими Русия 1 млрд. рубл маблағи коркардаашонро аз даст додаанд.
Хабаргузории
«Русская служба новостей»
бо истинод ба раиси ҳаракати умумирусиягии ҷамъиятии «Муҳоҷирони меҳнатии тоҷик» Каромат Шарипов дар ин робита иттилоъ медиҳад, ки ин ба муҳоҷирони машғули кор дар корхонаву муассисаҳои сармоягузорони хориҷӣ, бозорҳо ва сохтмони тобеъи соҳибкорони ғайриқонунӣ дахл дорад.
Бино ба маълумоти Шарипов, танҳо 5%-и шаҳрвандони Тоҷикистон дар корхонаву муассисаҳои сохторҳои давлатӣ машғули кор буда, аз он ҷо музди меҳнат мегиранд.
Ба андешаи раиси ҳаракат, дар чунин шароит муҳоҷирати корӣ қобили қабул нест. «Ман мухолифи муҳоҷирони корӣ нестам, онҳо барои Русия заруранд, вале бо чӣ рӯбарӯ шудани онҳоро мо имрӯз мушоҳида дорем. Давлати Русия бояд ба онҳо масъул бошад. Бояд як бастаи муқаррароти ҳифзи иҷтимоии онҳо вуҷуд дошта бошад. Онҳо бояд худро инсон эҳсос намоянд», – таъкид доштааст Шарипов.
Қаблан ӯ ба ин хабаргузорӣ иттилоъ дода буд, ки то аввали бахори соли 2015 ҳамаи шаҳрвандони Тоҷикистон шаҳри Маскавро тарк мекунанд, ки ин ба афтиши қурби рубл, роҳандози сиёсати нави Русия дар бахши муҳоҷират ва зарурати дастрас кардани патенти махсус аз 1-уми январи соли 2015 марбут аст.
