Шумори нафақахӯрони Тоҷикистон, ки тариқи кортҳои бонкӣ нафақа мегиранд, ба аввали соли равон 370 ҳазор нафарро ташкил дод.
Раиси Бонки давлатии амонатгузории «Амонатбонк» Ҷамшед Нурмаҳмадзода зимни нишасти хабарӣ дар ин робита иттилоъ дод, ки айни замон бо нафақа таъмин намудани аҳолӣ тариқи кортҳои бонкӣ дар 32 шаҳру навоҳии кишвар ба роҳ монда шудааст.
Нурмаҳмадзода қайд кард, ки айни замон корҳои роҳандозии чунин низоми додани нафақа дар 8 шаҳру навоҳии кишвар, ки дар онҳо беш аз 100 ҳазор нафар нафақахӯрон зиндагӣ мекунанд, идома доранд. «Дар саросари кишвар дар маҷмӯъ ҳудуди 600 ҳазор нафақахӯрон зиндагӣ мекунанд», – иброз дошт ӯ.
Зимнан зикр гардид, ки айни замон тавассути кортҳои бонкӣ «Амонатбонк» ба зиёда аз 623 ҳазор мизоҷон хизматгузорӣ мекунад. «Таъмини нафақахӯрон ва кормандони ташкилотҳои буҷетӣ бо кортҳои бонкӣ ройгон сурат мегирад», – гуфт раиси бонк.
Номбурда илова кард, ки феълан дар қаламрави кишвар 141 адад банкоматҳо ва 557 адад пост-терминалҳои «Амонатбонк» ба аҳолӣ хизматгузорӣ мекунанд.
