Ректори Донишгоҳи давлатии омӯзгории Тоҷикистон Носирҷон Салимӣ ва олим Холмаҳмад Самеъ пешниҳод карданд, ки барои хизматҳои шоиста назди мардуми тоҷик сарвари давлат Эмомалӣ Раҳмон «пешвои миллат» эълон карда шавад.
Дар
мақолаи интишоршудаи
олимони зикршуда дар сомонаи расмии Ҳизби халқии демократии Тоҷикистон дар ин робита зикр мегардад, ки президент бо кору аъмоли худ ба «пешвои миллат» шумурда шудан ҳуқуқ дорад.
Дар муроҷиати худ олимон хизматҳои Эмомалӣ Раҳмон баҳри истиқрори сулҳ дар кишварро ёдовар шуда, барномаи рушди иқтисодӣ ва раҳоӣ ёфтан аз бунбасти коммуникатсиониро ба Барномаҳои «Пешомади 2020» дар Малайзия, «Роҳи нав» – и Рузвелт, «Ҷаҳиши бузург»- и Дэн Сяопин, «Барномаи саноатикунонии Сингапур» – и Ли Куан Ю ҳаммонанд месозанд ва эътироф мекунанд, ки чунин падида дар фарҳанги сиёсии давлатҳои нави соҳибистиқлол тозаву нодир аст.
«Эътирофи падидаи пешвои миллат на танҳо ба хотири қадршиносии хидматҳои ашхосест, ки дар як давраи таърихии миллате, кишваре нақши сарнавиштсоз доштанд ё доранд, низ ба хотири он аст, ки он омили муттаҳидсозанда ва пешбаранда мебошад. Шояд пешвоён, чун Эмомалӣ Раҳмон, зарурат ба чунин эътироф надоранд. Аммо миллатҳо, кишварҳо дар шароити бархурди шадиди тамаддунҳо, манфиатҳо, ҷаҳонишавӣ зарурат ба пешвоёни расман эътирофгашта доранд», – омадааст дар мақола.
Дар ҳамин ҳол, дар бораи вокунишу назари президент Эмомалӣ Раҳмон нисбати ин пешниҳод алҳол ҳеҷ маълумоте дастрас нест.
