Дар шаҳри Душанбе нақшаи даъват ба хизмати ҳатмии ҳарбӣ дар сафи Қувваҳои Мусаллаҳи Тоҷикистон ба иҷро расид.
Тибқи иттилои Комиссариати ҳарбии шаҳри Душанбе, нақшаи даъвати баҳорӣ ба сафи Қувваҳои Мусаллаҳ дар пойтахт 30 апрели соли ҷорӣ пеш аз муҳлати муқарраршуда иҷро гардида, аксари даъватшавандагон ихтиёран ба адои қарз назди ватан ҳозир шудаанд.
Қаблан сардори маркази матбуоти Вазорати мудофиаи Тоҷикистон подполковник Фаридун Маҳмадалиев ба «Азия-Плюс» дар ин робита иттилоъ дода буд, ки то санаи 29 апрел нақшаи даъват ба хизмати ҳарбӣ дар саросари ҷумҳурӣ 93% иҷро шудааст.
Ба гуфтаи ӯ, нақшаи даъват дар 38 шаҳру навоҳии кишвар пурра ба иҷро расидааст. «То ин сана нақшаи даъват дар вилояти Хатлон – 99%, ВМКБ – 91%, Суғд – 92% ва навоҳии тобеи марказ – 86% ба иҷро расидааст», – изҳор дошта буд номбурда.
