Дар муқоиса бо моҳи гузашта моҳи майи соли ҷорӣ ҳаҷми интиқоли нерӯи барқ аз Тоҷикистон ба Афғонистон қариб 3 баробар афзуд.
Бино ба маълумоти гузориши ҳармоҳаи Вазорати рушди иқтисод ва савдои ҷумҳурӣ «Низоми мониторинг ва огоҳкунии пешакӣ дар Тоҷикистон» бо такя ба маълумоти ширкати «Барқи тоҷик», моҳи майи соли равон аз нерӯгоҳҳои «Сангтӯда-1» ва «Сангтӯда-2» ба Афғонистон дар ҳаҷми 129,6 млн. кВт/соат нерӯи барқ интиқол дода шудааст. Моҳи апрели соли ҷорӣ аз Тоҷикистон ба кишвари ҳамсоя ҳамагӣ 44 млн. кВт/соат нерӯи барқ содирот гардида буд.
Миқдори нерӯи барқи аз Тоҷикистон ба Афғонистон содиротшуда дар моҳи майи соли ҷорӣ 9,4% аз ҳаҷми умумии нерӯи барқи дар ин моҳ истеҳсолшуда дар кишварро ташкил медиҳад.
Тибқи маълумоти ширкати «Барқи тоҷик», моҳи майи соли равон ҳаҷми умумии истеҳсоли нерӯи барқ дар Тоҷикистон 1 млрд. 381 млн. кВт/соатро ташкил додааст.
Гуфта мешавад, давоми моҳҳои январ-майи соли равон ба истеъмолгарони афғон аз Тоҷикистон дар маҷмӯъ қариб 350 млн. кВт/соат нерӯи барқ интиқол дода шудааст.
