Тӯли 5 моҳи соли ҷорӣ ба Тоҷикистон ҳудуди 135 ҳазор тонна гази моеъ ворид карда шуд, ки нисбат ба ҳамин давраи соли гузашта қариб 23% зиёдтар аст.
Аз Вазорати рушди иқтисод ва савдои Тоҷикистон ба «Азия-Плюс» дар ин робита иттилоъ доданд, ки моҳи майи соли ҷорӣ ба ҷумҳурӣ 24 ҳазор тонна ин навъи сӯзишворӣ оварда шудааст.
Тоҷикистон маъмулан гази моеъро аз Қазоқистон ворид мекунад, ки ба ҳиссаи ин кишвар тақрибан 80%-и гази моеъи воридшуда тайи 5 моҳи соли равон рост меояд. Ба миқдори начандон зиёд ба Тоҷикистон гази моеъ ҳамчунин аз Русия ва Туркманистон низ ворид карда мешавад.
Дар Вазорати рушди иқтисод ва савдои ҷумҳурӣ қайд карданд, ки имрӯз беш аз 60%-и нақлиёти автомобилии Тоҷикистон ба сифати сӯзишворӣ аз гази моеъ истифода мекунанд.
