Роҳбаладони ширкати ҳавопаймоии «Сомон Эйр» либоси расмии худро тағйир доданд. Акнун либоси онҳо аз рангҳои марҷонӣ ва нилобӣ иборат мебошад.
Тавре аз хадамоти матбуои ширкати ҳавопаймоии «Сомон Эйр» хабар доданд, бастаи либосҳои нави духтарон аз нимтана, юбка, шим, пиҷак, шарф, плаш, ду намуд пойафзол ва либоси мардона бошад аз костюм, курта, гарданбанд, плаш ва пойафзол иборат мебошад.
Дар либоси роҳбаладон нишонаи ширкати ҳавопаймоӣ дарҷ гардидааст. Дар тугмачаҳои либосҳо тамғаи ширкат, шарфҳои занона ва гарданбандҳои мардона бошад, бо нақшу нигори шарқӣ оро дода шудаанд, ки дар дохили ҳавопаймои Боинг 737-900 низ ин ороишро дидан мумкин аст. Либосҳои нав бо фармоиши ширкати ҳавопаймоӣ, дар ширкати туркии Remtex Uniform омода шудаанд.
Қобили зикр аст, ки феълан «Сомон Эйр» парвозҳоро аз Тоҷикистон ба самтҳои Олмон, АМА, Туркия, Хитой, Россия ва Қазоқистон амалӣ мекунад. Пойгоҳи ширкати ҳавопаймоии «Сомон Эйр» аз ҳавопаймоҳои Боинг 737-300, -800 ва -900 иборат мебошад.
