Дар зарфи 8 моҳи соли равон дар корхонаҳои саноатии Тоҷикистон ба маблағи ҳудуди 7,2 млрд. сомонӣ (беш аз 1,1 млрд. доллари ИМА тибқи қурби ҳозира) маҳсулот истеҳсол карда шуд.
Тавре аз Агентии омори назди президенти ҶТ иттилоъ доданд, ин нишондиҳанда нисбат ба ҳамин давраи соли гузашта аз рӯи таносуби нарх ба андозаи 13,3% зиёдтар аст.
Афзоиши ҳаҷми истеҳсоли маҳсулоти саноатиро нисбат ба ҳамин давраи соли гузашта дар Агентии омор «ба зиёдшавии назарраси истеҳсолот дар бахшҳои саноати дӯзандагиу бофандагӣ, истеҳсоли пӯст ва маснӯот аз он, истеҳсоли пойафзол, коркарди чӯб ва маснӯот аз чӯб, истеҳсоли коғаз, фаъолияти ноширӣ, саноати кимиё, маҳсулоти ғайриметаллии минералӣ, афзоиши истеҳсолот дар бахши металлургия ва маснӯоти тайёр аз металл, тавлиди нерӯи барқ ва ғайра нисбат медиҳанд».
Гуфта мешавад, аз 90 навъи маҳсулоти саноатии муҳим давоми моҳҳои январ-августи соли 2015 дар 47 номгӯи он (52,2%) истеҳсоли ҳаҷми маҳсулот афзоиш ва дар 31 номгӯй (34,4%) истеҳсоли он коҳиш ёфта, 12 номгӯи (13,4%) маҳсулот истеҳсол нашудааст.
Дар ҳамин ҳол, ҳаҷми саноати истихроҷ аз ҳисоби истеҳсоли ангиштсанг – 23,9%, ангишти тира – 4,4%, нафт – 1,4%, газ – 1,6 баробар ва маводи ғайримаъданӣ – 27,9% афзудааст.
Ҳаҷми истеҳсол дар саноати коркард давоми моҳҳои январ-августи соли ҷорӣ беш аз 4,4 млрд. сомониро ташкил дода, ҳаҷми истеҳсол ва тақсимоти нерӯи барқ, газ ва об дар ин давра ба 1,7 млрд. сомонӣ баробар шудааст.
