Шурӯъ аз имрӯз ширкатҳои алоқаи мобилии Тоҷикистон фаъолияти хизматгузории ирсоли смс-паёмакҳоро пурра барқарор намуданд. Қаблан ин ширкатҳо смс-паёмакҳои дорои хусусияти техникӣ, аз ҷумла смс-паёмак дар бораи пур кардани тавозун, оид ба занги посухнадода ва ғайраро барқарор карда буданд.
Пас аз оғози амалиёти махсус дар минтақаи шарқи ҷумҳурӣ оид ба безарар гардонидани гурӯҳи мусаллаҳи ҷиноятпешаи генерали фирорӣ Абдуҳалим Назарзода, нимаи дуюми рӯзи 6 сентябр ширкатҳои алоқаи мобилӣ хизматгузории ирсоли смс-паёмакҳо барои тамоми муштариёнро қатъ намуда буданд. Дирӯз, 16 сентябр амалиёти безарар гардонидани ин гурӯҳ ба итмом расид.
Ширкатҳои мобилӣ он замон ин амалро ба мушкилоти техникӣ нисбат дода буданд. Қобили зикр аст, ки ширкатҳои мобилӣ 10 октябри соли гузашта, замоне, ки дар ҷумҳурӣ дар бораи имкони баргузории гирдиҳамойии эътирозӣ дар Душанбе овозаҳо паҳн шуда буданд, низ ба ин амал даст зада буданд ва ҳамон рӯз баъди тасдиқ нашудани овозаҳо дар бораи гирдиҳамойӣ, дастрасӣ ба ин хизматгузорӣ барқарор шуда буд.
