Дар Хонаи футболи Иттифоқи футболи Русия дар Маскав рӯзи 17 декабр маросими қуръапартоии мусобиқаи футболи Ҷоми Иттиҳод-2016 доир гардид, ки дар натиҷа 8 даста ба ду гурӯҳ ҷудо карда шуданд.
Бино ба иттилои Федератсияи футболи Тоҷикистон, дастаи мунтахаби ҷавонони зери 22-солаи Тоҷикистон дар гурӯҳи «В» қарор гирифта, бо дастаҳои Русия, Латвия ва Эстония қувваозмоӣ мекунад. Гурӯҳи «А» аз дастаҳои Беларус, Қирғизистон, Қазоқистон ва Молдова иборат аст. Мусобиқа аз 16 то 24 январ дар Санкт-Петербурги Федератсияи Русия доир хоҳад шуд.
Қобили зикр аст, ки мураббии калони мунтахаби миллии Тоҷикистон, мутахассиси украинӣ Роман Пилипчук дастаи мунтахаби Тоҷикистонро ба ин мусобиқа омода мекунад. Ба ситоди мураббиёни мунтахаби ҷавонони кишвар, инчунин сармураббии «Вахш»-и Қӯрғонтеппа Рустам Хоҷаев ва устоди ҳайати ҷавонони «Истиқлол»-и Душанбе Баҳодур Сӯфиев шомил гаштанд. Мураббии омодагии ҷисмонии даста, мутахассиси украинӣ Владимир Власенко таъин шуда, дарвозабонҳои мунтахаби ҷавонони Тоҷикистон зери роҳбарии Амоншо Содатсайров тамрин хоҳанд кард.
Натиҷаҳои қуръапартоии мусобиқаи футболи Ҷоми Иттиҳод-2016:
Гурӯҳи «А»:
Беларус, Қирғизистон, Қазоқистон, Молдова.
Группа «В»:
Латвия, Эстония, Русия,
Тоҷикистон.
